Isroil falastinliklarning jasadlaridan tana a’zolarini o‘g‘irlashda ayblanmoqda

G‘azo hokimiyati Isroil armiyasini falastinliklarning jasadlaridan tana a’zolarini o‘g‘irlashda ayblab, bu «dahshatli jinoyat»ni tekshirish uchun xalqaro qo‘mita tuzishga chaqirdi. «So‘nggi uch kun ichida (Isroil) okkupatsiyasi Xalqaro Qizil yarim oy jamiyati orqali 120 ta jasadni topshirdi. Ularning aksariyati ayanchli ahvolda bo‘lib, qatl qilingani va muntazam qiynoqlar izlarini ko‘rsatardi», - degan bugun, 17 oktyabr kuni hukumat matbuot xizmati rahbari Ismoil Savabta. Uning aytishicha, ba’zi marhumlar «ko‘zlari bog‘langan va qo‘l-oyoqlari kishan solingan holda,boshqalari esa bo‘yinlarida qasddan o‘ldirilganini ko‘rsatuvchi bo‘g‘ilish belgilari va arqon izlari bilan qaytarilgan». «Ko‘plab jasadlarning qismlari, jumladan ko‘zlari, shox pardalari va boshqa a’zolari yo‘q edi», - deya ta’kidladi Savabta. Uning so‘zlariga ko‘ra, bu Isroil armiyasi «jasadlarni ushlab turgan paytda inson a’zolarini o‘g‘irlaganini» tasdiqlaydi va u bu harakatni «vahshiyona jinoyat» deb atadi. Falastin rasmiysi xalqaro hamjamiyat va inson huquqlari tashkilotlarini «shahidlarning jasadlariga nisbatan jiddiy qonunbuzarliklar va ularning a’zolarini o‘g‘irlash uchun Isroilni javobgarlikka tortish maqsadida zudlik bilan xalqaro tergov qo‘mitasini tuzishga» chaqirdi. Isroil harbiy kuchlari bu ayblovlarga javob bermadi. Falastin milliy kampaniyasi ma’lumotlariga ko‘ra, hozirda Isroil 735 nafar falastinlik mahbusning jasadini, jumladan 67 nafar bolaning jasadini saqlab turibdi. Isroilning «Haaretz» gazetasi xabar berishicha, Isroilning janubidagi Negev sahrosida joylashgan Sde Teiman harbiy bazasida G‘azodagi falastinliklarning 1500 ga yaqin jasadi mavjud. HAMAS tashkiloti bu oy boshida Isroil bilan erishilgan vaqtinchalik to‘xtatish kelishuvi doirasida 20 nafar tirik isroillik garovga olinganlarni ozod qildi va 2 mingga yaqin falastinlik mahbus evaziga yana 10 nafar asirning qoldiqlarini topshirdi. Mazkur kelishuv AQSH prezidenti Donald Tramp tomonidan taqdim etilgan 20 bandli rejaga asoslangan bo‘lib, unda G‘azoni qayta qurish va HAMASsiz yangi boshqaruv tizimini o‘rnatish ham nazarda tutilgan. 2023 yil oktyabr oyidan buyon Isroil hujumlari oqibatida G‘azoda 68 mingga yaqin falastinlik halok bo‘ldi. Ularning aksariyati ayollar va bolalardir. Hududning katta qismi esa yashash uchun yaroqsiz holga keldi.