Isroil keyingi 48 soat ichida Eronni mag‘lub etmoqchi

Isroil xavfsizlik xizmatlariga yaqin manbaning ma’lum qilishicha, keyingi 48 soat Eronga qarshi urushda hal qiluvchi bo‘lishi mumkin. Bu bayonot yadroviy ob’ektlarga uyushtirilgan hujumlar va xalqaro keskinlik fonida yangradi. Xalqaro atom energiyasi agentligi (AEXA) sun’iy yo‘ldosh tasvirlari asosida Eronning Natanz shahridagi uranni boyitishga mo‘ljallangan yer osti inshootlariga zarba berilganligi izlarini aniqlaganini ma’lum qildi. Bu yadroviy inshootlarga nisbatan amalga oshirilgan havo hujumlari haqidagi taxminlarni kuchaytirdi. AQSH prezidenti Donald Tramp Eronga nisbatan Rossiya yoki Shimoliy Koreyadan qo‘shimcha yordam kuchaygani to‘g‘risida hech qanday dalil ko‘rmaganini bildirdi. Uning so‘zlariga ko‘ra, «hech kim bu ishga aralashishni xohlamaydi». Isroil hukumati Eron bilan vaziyatni hal qilish bo‘yicha hech qanday muzokaralar olib bormayotganini ma’lum qildi. Ma’lumotlarga ko‘ra, Isroil bugun Tehron va Fo‘rdu hududidagi muhim harbiy va yadroviy ob’ektlarga yana avia va raketa zarbalari berishni rejalashtirmoqda.