Iyun — Isroil uchun eng ko‘p qurbonlar bilan yakunlangan oy bo‘ldi

Isroilning Yedioth Ahronoth nashri yozganidek, iyun oyida Isroil armiyasi uchun eng qonli oy bo‘lib qayd etildi. Eng katta yo‘qotishlar 24 iyun kuni Xon Yunusda ro‘y berdi — o‘sha kuni 15 harbiy halok bo‘lgan. Eron bilan bo‘lib o‘tayotgan o‘zaro havo zarbalaridan ko‘ra ko‘proq qurbonlar HAMAS bilan bo‘lgan to‘qnashuvlar vaqtida qayd etilgan. Iyul oyi ham Isroil armiyasi uchun yo‘qotishlar bilan boshlandi. G‘azo sektori shimolida 7-zirhli tank brigadasi tankisti, serjant Yaniv Mixalovich hujum natijasida halok bo‘ldi. Uning tankiga qarshi raketa bilan zarba berilgan. Shu jangda tank komandiri va yana bir askar og‘ir yaralangan. Ikki nafar askar o‘rtacha darajada yaralanib, yana biri yengil jarohat olgan. Shuningdek, Shejayyada bo‘lib o‘tgan yana bir to‘qnashuvda «Egoz» maxsus bo‘linmasi askari tankiga qarshi raketa zarbasi natijasida og‘ir yaralangan. O‘tgan hafta Isroil armiyasi Puma bronetransportyori portlatilganini tan oldi. Ushbu hodisada mashinani o‘chirish imkoni bo‘lmagan va unda bo‘lgan yetti nafar askar tiriklay yonib ketgan. Rasmiy ma’lumotlarga ko‘ra, 2023 yil oktyabridan beri Isroil armiyasi umumiy yo‘qotishlari 6913 nafarni tashkil etdi: 881 harbiy halok bo‘lgan, 6032 kishi yaralangan. Shu bilan birga, sobiq bosh vazir va muxolifat yetakchisi Yair Lapid hukumat haqiqiy yo‘qotishlar sonini kamaytirib ko‘rsatayotganini bildirgan edi.