MIB qarzi borlarning telefoni bloklanishi haqidagi xabarlarni inkor etdi
Ijro hujjatlari bo‘yicha qarzi bor fuqarolarning mobil qurilmalari bloklanishi haqidagi ma’lumotlar asossiz asossiz ekani ma’lum qilindi.
Ijtimoiy tarmoqlarda majburiy ijro byurosidan qarzi mavjud shaxslarning mobil telefonlari bloklanishi mumkinligi haqida xabarlar tarqaldi. Majburiy ijro byurosi bu ma’lumotlarni rad etib, ular haqiqatga to‘g‘ri kelmasligini bildirdi.
Byuro ma’lumotiga ko‘ra, ijro hujjatlari asosida qarzi mavjud bo‘lgan fuqarolarga tegishli mobil telefon qurilmalarini bloklash bo‘yicha hech qanday amaliyot yoki huquqiy mexanizm mavjud emas. Shu munosabat bilan tarqalayotgan xabarlar feyk hisoblanadi va fuqarolarni chalg‘itishga qaratilgan.
Qarzdorlik holatidagi cheklovlar
MIB fuqarolar qarzdorlik holati yoki ijro hujjatlari doirasida xorijga chiqishga cheklov bor-yo‘qligini mustaqil ravishda tekshirishlari mumkinligini eslatdi. Buning uchun byuroning rasmiy veb-sayti hamda Android va iOS platformalaridagi mobil ilovalari orqali ma’lumot olish imkoni mavjud.
Tashkilot ta’kidlashicha, mavjud qarzdorliklar va ularni undirish bilan bog‘liq ijro harakatlari mobil telefon yoki boshqa elektron qurilmalarning ishlashiga ta’sir ko‘rsatmaydi. Qarzdorlik faqat qonun doirasida belgilangan moliyaviy va huquqiy choralar orqali undiriladi.
MIB bilan bog‘liq firibgarlik
Shuningdek, MIB avvalroq o‘z nomi bilan bog‘liq firibgarlik holatlari ko‘paygani haqida ogohlantirgan edi. Fuqarolarga byuro nomidan kelgan shubhali xabarlar orqali ilovalarni yuklab olmaslik tavsiya etilgan, chunki bunday holatlarda bank kartalari ma’lumotlari qo‘lga kiritilishi mumkin.
Byuro aholini faqat rasmiy manbalarga ishonishga va tasdiqlanmagan axborotlarni tarqatmaslikka chaqirdi.
