O‘zbekiston futbol jamoasi FIFA reytingida 55-o‘ringa ko‘tarildi
11.07.2025 | 12:3319382
O‘zbekiston milliy futbol jamoasi FIFA reytingida ikki pog‘ona yuqori ko‘tarilib, 55-o‘rinni egalladi. Bu natija jamoaning so‘nggi oylardagi muvaffaqiyatli o‘yinlari bilan bog‘liq bo‘lib, jahon chempionati yo‘llanmasi hamda Qatar ustidan qozongan g‘alaba muhim rol o‘ynadi.
Xalqaro futbol federatsiyasi (FIFA) 2025 yil iyul oyi uchun yangilangan reytingni e’lon qildi. Unga ko‘ra, O‘zbekiston Osiyo futbol konfederatsiyasida Yaponiya, Eron, Janubiy Koreya, Avstraliya va Qatardan keyingi oltinchi o‘rinni egallab turibdi. Reytingda bizdan keyin Iroq va Saudiya Arabistoni jamoalari joy olgan.
O‘zbekiston jamoasi iyun oyida 2026 yilda AQSH, Kanada va Meksikada bo‘lib o‘tadigan jahon chempionati saralash bosqichining ikki muhim uchrashuvini o‘tkazdi. 5 iyun kuni OAEga qarshi safarda 0:0 hisobida durang qayd etilib, bu natija orqali jamoamiz tarixda ilk bor mundialga yo‘llanmani qo‘lga kiritdi.
10 iyun kuni Toshkentdagi «Bunyodkor» stadionida Qatarga qarshi o‘yinda O‘zbekiston 3:0 hisobida ishonchli g‘alaba qozondi. Bu natijalar milliy jamoaning xalqaro maydondagi nufuzini oshirdi va FIFA reytingidagi o‘rnini mustahkamladi.
Ayni paytda FIFA reytingida birinchi o‘rinda Argentina, ikkinchi o‘rinda Ispaniya va uchinchi o‘rinda Fransiya jamoalari joylashgan.
