O‘zbekiston va Qozog‘iston Sirdaryoda 10 ta gidropost o‘rnatadi

O‘zbekiston va Qozog‘iston Markaziy Osiyoda suvni tejovchi texnologiyalarni joriy etish va ulardan foydalanish bo‘yicha tajriba almashishga kelishib oldi. Bu haqda Qozog‘iston Suv resurslari va irrigatsiya vazirligi matbuot xizmati xabar berdi.

Qayd etilishicha, ikki mamlakat suv xo‘jaligi vazirlari Shavkat Hamrayev va Nurjan Nurjigitov Turkistonda uchrashgan. Tomonlar suv tejovchi texnologiyalarni joriy etish va ulardan foydalanish sohasida tajriba almashishga kelishib oldi. Bundan tashqari, Sirdaryo daryosida o‘nta avtomatlashtirilgan gidropost o‘rnatish loyihasini amalga oshirishni boshlash rejalashtirilgan. Har bir davlat hududida beshtadan obyekt quriladi.

Germaniya xalqaro hamkorlik jamiyati (GIZ) ko‘magida ishlab chiqilgan ushbu loyiha transchegaraviy suv taqsimotining shaffofligi va aniqligini ta’minlashga qaratilgan. Hozirgi vaqtda GIZ ushbu loyiha bo‘yicha texnik topshiriqni ishlab chiqishni yakunladi.

Parallel ravishda mamlakatlar 2026 yilda «Do‘stlik» davlatlararo kanalida ishlarni kengaytirish, jumladan, mexanizatsiyalashgan tozalash va bosh inshootlarni ta’mirlashni rejalashtirgan.

Bundan tashqari, idoralar qishloq xo‘jaligini global iqlim o‘zgarishi va resurslar taqchilligi sharoitiga moslashtirish uchun tomchilatib va yomg‘ir bilan sug‘orish tizimlarini joriy etish sohasida faol tajriba almashishga kelishib oldi.