O‘zbekistonda bank aktivlari 866,8 trln so‘mga yetdi
Markaziy bank ma’lumotlariga ko‘ra, tijorat banklari aktivlari 2025 yil 1 oktyabr holatiga ko‘ra 866,8 trln so‘mni tashkil etdi. Bu o‘tgan yilga nisbatan 17 foizga, real hisobda esa 20 foizga ko‘pdir.
O‘zbekiston bank tizimi barcha asosiy ko‘rsatkichlar bo‘yicha barqaror o‘sishni namoyon etmoqda. Markaziy bank hisobotida qayd etilishicha, 2025 yil 1 oktyabr holatiga tijorat banklarining jami aktivlari 866,8 trln so‘mga yetgan. Bu ko‘rsatkich bir yil ichida 17 foizga o‘sgan bo‘lsa, inflyatsiya ta’siri hisobga olinganda real o‘sish 20 foizni tashkil etdi.
Jami aktivlar tarkibida 332,9 trln so‘m yoki 38 foiz xorijiy valyutadagi mablag‘larga to‘g‘ri keladi. Bu ko‘rsatkich o‘tgan yili 43 foizni tashkil etgan edi, ya’ni valyutali aktivlar ulushining kamayishi bank sektorining dollarsizlashtirish jarayonini aks ettiradi.
Kredit portfeli yil davomida 515,6 trln so‘mdan 582,2 trln so‘mgacha oshdi. Shu jumladan, 228,7 trln so‘m (39 foiz) xorijiy valyutada berilgan kreditlardir. Nominal o‘sish 13 foizni, real hisobda esa 15 foizni tashkil etdi.
Bank tizimidagi depozitlar hajmi ham jadal o‘sib, 286,9 trln so‘mdan 371,5 trln so‘mga yetdi. Bu yillik 29 foiz (realda 31 foiz) o‘sish demakdir. Ulardan 83,7 trln so‘m yoki 23 foiz xorijiy valyutada joylashtirilgan bo‘lib, o‘tgan yilgi 27 foizdan kamaygan.
Banklar jami kapitali 130,4 trln so‘mni tashkil etdi va yil davomida 19 foizga o‘sdi. Markaziy bankning ta’kidlashicha, aktivlar, kreditlar va depozitlar bo‘yicha o‘sish bank tizimining barqarorligini hamda iqtisodiyotdagi likvidlikni ta’minlab turibdi.
