O‘zbekistonda birinchi alyuminiy qadoq ishlab chiqarish zavodi ishga tushdi

O‘zbekiston Prezidenti Shavkat Mirziyoyev poytaxtning Yangihayot tumanida joylashgan «Yangi avlod» maxsus sanoat zonasida bo‘lib, alyuminiy qadoq ishlab chiqarish va salqin ichimliklar quyishga ixtisoslashgan «East Can Solutions» zavodi faoliyati bilan tanishdi. Bu mamlakatimizda alyuminiy qadoq mahsulotini mahalliy sharoitda ishlab chiqaradigan ilk korxona hisoblanadi. So‘nggi yillarda O‘zbekistonda sanoatlashtirish siyosati yangi bosqichga ko‘tarilib, xalqaro standartlarga javob beradigan ishlab chiqarish quvvatlari barpo etilmoqda. «East Can Solutions» shular orasida sanoat rivojida muhim burilish nuqtasi bo‘ldi. Qiymati 90 million AQSH dollari bo‘lgan loyiha asosan xorijiy investitsiyalar hisobiga amalga oshirildi. Korxona 21 gektar maydonda joylashgan bo‘lib, AQSH, Buyuk Britaniya, Italiya va Germaniyada ishlab chiqarilgan uskunalar bilan jihozlangan. Ishlab chiqarish jarayoni to‘liq raqamlashtirilgani sababli mahsulot sifati xalqaro talablarga mos darajada ta’minlanadi. Zavodning ishlab chiqarish quvvati bosqichma-bosqich oshiriladi. Ilk bosqichda yiliga 600 million dona qadoq ishlab chiqarish rejalashtirilgan bo‘lsa, keyingi bosqichlarda bu ko‘rsatkich 2,2 milliard donagacha yetkaziladi. Bu nafaqat ichki bozor ehtiyojini qondirish, balki mintaqada raqobatbardosh mahsulot eksport qilish imkonini ham yaratadi. Loyiha natijasida yiliga 60 million dollarlik import o‘rni qoplanib, 100 million dollarlik eksport imkoniyati yuzaga keladi. Mahalliylashtirish darajasi 90 foizga yetkazilib, ichki sanoat zanjirini mustahkamlashga xizmat qiladi. Zavod to‘liq ishga tushgandan so‘ng 500 ta yangi ish o‘rni yaratiladi. Bu nafaqat ishsizlikni kamaytiradi, balki mahalliy mutaxassislar uchun yangi imkoniyatlar eshigini ochadi. Korxona faoliyati orqali davlat byudjetiga ham salmoqli soliq tushumlari ta’minlanishi kutilmoqda. Prezident Mirziyoyevga «Yangi avlod» maxsus sanoat zonasida amalga oshirilayotgan boshqa loyihalar haqida ham ma’lumot berildi. Ushbu hududda 1,2 milliard dollarlik 58 ta sanoat loyihasi amalga oshirilmoqda, ular tufayli 7 ming 600 ta yangi ish o‘rni yaratilishi rejalashtirilgan. «East Can Solutions» alyuminiy qadoq ishlab chiqarish sohasida O‘zbekiston uchun yangi davrni boshlab berdi. U milliy sanoatni rivojlantirish, eksport salohiyatini oshirish va xalqaro bozorda raqobatbardoshlikni ta’minlashda muhim qadam bo‘ldi.