O‘zbekistonda oltin quymalar narxi rekord yangiladi

Markaziy bank ma’lumotlariga ko‘ra, narx bir kunda 0,36 foizga o‘sib, 1 510 660 so‘mga yetdi. Bu joriy yil boshidan beri 30-marta qayd etilgan rekord hisoblanadi. Yanada aniqroq aytganda, yillik hisobda oltin quymalar 38,3 foizga qimmatladi. Bozorda 5 grammli quymalarning bahosi 7 mln 553 ming so‘mni tashkil etdi. Bu esa avvalgi ko‘rsatkichdan 22 ming so‘mga baland. Yanvar oyida esa 100 grammli quymalar tijorat banklari orqali sotuvga chiqarilgan va shu tariqa taklif assortiment kengaytirilgan edi. Oltin quymalar 2020 yildan boshlab 5, 10, 20 va 50 grammli o‘lchamlarda savdoga chiqarila boshlagan. Bundan maqsad aholiga investitsiya va jamg‘arish imkoniyatlarini oshirish hamda qimmatbaho metallar muomalasini kengaytirishdir. Markaziy bankning tarixiy ma’lumotlariga ko‘ra, 2018 yilda oltin tangalar sotuvi boshlangan. Keyinchalik, qiymati yuqori bo‘lgan oltin quymalar ham bozorga kiritildi. Jismoniy shaxslarga ularni qadog‘i but holda O‘zbekistondan olib chiqishga ham ruxsat berildi. So‘nggi yillarda oltinga talab ortib, u aholi uchun ishonchli sarmoya vositasi sifatida ko‘rilmoqda. 2023 yil sentyabriga kelib, o‘zbekistonliklar qo‘lidagi oltin quymalarning umumiy og‘irligi 255 kilogrammga yetgani ma’lum qilingan. Eng xaridorgir turi esa 10 grammli quymalar bo‘lib chiqdi.