O‘zbekistondagi xorijiy korxonalar soni 18,5 mingdan oshdi

2026 yil 1-fevral holatiga ko‘ra, O‘zbekistonda chet el investitsiyalari ishtirokida jami 18 513 ta korxona faoliyat yuritmoqda. Milliy statistika qo‘mitasi ma’lumotlariga ko‘ra, ularning 4 282 tasi qo‘shma, 14 231 tasi esa xorijiy korxonalardir. So‘nggi besh yilda ushbu ko‘rsatkich 1,9 barobarga oshgani mamlakat investitsion muhitidagi faollikni ko‘rsatadi.

Xorijiy korxonalar ulushi 55,1 foizdan 76,9 foizgacha o‘sgani esa bozorda mustaqil chet el kompaniyalari ishtirokining sezilarli kengayganini anglatadi. Bu tendensiya investitsiyalarni jalb qilish, eksportni diversifikatsiya qilish va yangi ish o‘rinlari yaratish bilan bog‘liq davlat siyosatining natijasi sifatida baholanmoqda.

Investitsiyalar xaritasi

Chet el kapitali ishtirokidagi korxonalar soni bo‘yicha Xitoy yetakchilik qilmoqda. Dastlabki o‘ntalik quyidagi ko‘rinishga ega:

Xitoy — 5 218 ta;

Rossiya — 3 190 ta;

Turkiya — 2 149 ta;

Qozog‘iston — 1 221 ta;

Janubiy Koreya — 699 ta;

Afg‘oniston — 647 ta;

BAA — 413 ta;

Tojikiston — 410 ta;

Hindiston — 394 ta;

Ozarboyjon — 368 ta.

Bu geografiya O‘zbekiston bozoriga Markaziy Osiyo, Osiyo-Tinch okeani va Yaqin Sharq sarmoyasi faol kirib kelayotganini ko‘rsatadi.

O‘sish tendensiyasi

So‘nggi yillarda savdo, sanoat, qurilish va xizmat ko‘rsatish sohalari chet el sarmoyasi uchun asosiy yo‘nalish bo‘lib qolmoqda. Xorijiy kompaniyalar ulushining ortishi investorlar uchun huquqiy kafolatlar va soliq imtiyozlari samara berganini anglatadi.

Biroq investitsiya hajmi bilan bir qatorda, texnologiya transferi, mahalliylashtirish va eksportbop mahsulot ishlab chiqarish darajasi ham muhim mezon bo‘lib qolmoqda. Shu nuqtai nazardan, miqdoriy o‘sish sifat ko‘rsatkichlari bilan uyg‘unlashgan taqdirdagina iqtisodiy samaradorlik ta’minlanadi.

Eslatib o‘tamiz, avvalroq faoliyat turlari kesimida xorijiy korxonalarning eng katta qismi savdo sohasiga to‘g‘ri kelishi haqida xabar bergan edik. 2025 yilda bu yo‘nalishda 6 403 ta korxona ish yuritib, umumiy xorijiy biznesning eng katta qismini tashkil etgan.