Pekinning ikki yuzi: Kiyevga yordam, Moskvaga resurslar bermoqda

AQSHning NATOdagi elchisi Metyu Uitaker Xitoyni Rossiya bosqinini to‘xtatish imkoniga ega bo‘la turib, bundan foydalanmayotganlikda aybladi. Uning bayonotiga ko‘ra, Pekin Ukrainaga insonparvarlik yordamini taklif etayotgan bir paytda Moskvadan neft va gaz xarid qilish orqali urushni bilvosita qo‘llab-quvvatlamoqda. Bu haqda «Fox News» xabar berdi.

Uitakerning ta’kidlashicha, Xitoy Rossiya prezidenti Vladimir Putin bilan muloqot qilib, ikki maqsadda qo‘llaniladigan texnologiyalar savdosini hamda energiya resurslari importini to‘xtatsa, urushga qisqa muddatda chek qo‘yish mumkin.

«Bilasizmi, bu urush to‘liq Xitoy tomonidan qo‘llab-quvvatlanmoqda», — dedi u.

Myunxen uchrashuvi va Pekinning pozitsiyasi

Bayonot Myunxen xavfsizlik konferensiyasi doirasida Xitoy tashqi ishlar vaziri Van I va Ukraina tashqi ishlar vaziri Andrey Sibiganing uchrashuvidan so‘ng yangradi. Uchrashuvda Pekin Rossiya zarbalari oqibatlarini yumshatish uchun Ukraina energetika infratuzilmasiga insonparvarlik yordami ko‘rsatishga va’da bergan.

Pekin rasmiylari Xitoy inqirozni siyosiy yo‘l bilan hal etish tarafdori ekanini, hech qaysi tomonni qo‘llamayotganini ta’kidlab keladi. Ular Moskvaga o‘ldiruvchi qurollar yetkazib bergani haqidagi ayblovlarni ham rad etgan.

Vashington qarashi va strategik bog‘liqlik

Shunga qaramay, Vashingtonda Xitoy Rossiyaning asosiy tashqi yordamchisi sifatida ko‘rilmoqda. «Fox News» ma’lumotiga ko‘ra, Xitoy to‘g‘ridan-to‘g‘ri qurol yetkazib bermasa-da, Rossiya dronlar va harbiy texnika uchun zarur ehtiyot qismlar borasida Pekinga qaram bo‘lib qolgan.