Prezident administratsiyasi kuch tuzilmalari rahbarlariga muhim vazifa yukladi
Saida Mirziyoyeva giyohvand moddalar tarqalishi va uyushgan jinoyatchilikka qarshi tezkor tizim yaratish zarurligini ta’kidladi.
Bugun, 28-noyabr kuni Prezident administratsiyasi rahbari Saida Mirziyoyeva kuch tuzilmalari rahbarlari bilan giyohvand moddalar savdosi va uyushgan jinoyatchilikka qarshi kurashish yuzasidan ishchi yig‘ilish o‘tkazdi. Bu haqda u o‘zining ijtimoiy tarmoqdagi sahifasida ma’lum qildi.
Yig‘ilishda narkojinoyatchilik, jinoiy guruhlar va noqonuniy qurol-yarog‘ aylanmasiga qarshi kurashish bo‘yicha muvofiqlashtirilgan samarali tizimni qisqa muddatda yaratish vazifasi qo‘yildi.
«Jamiyatda, birinchi navbatda yoshlar orasida giyohvand moddalarning tarqalishiga yo‘l qo‘ymaslik, yosh avlodni giyohvandlik asrash va fuqarolar xavfsizligini ta’minlash davlatning bevosita burchidir. Bu yo‘nalishdagi har qanday noqonuniy xatti-harakatlarga qat’iy ravishda chek qo‘yilishi shart», - deya yozdi Saida Mirziyoyeva.
