Propan narxi keskin oshdi, dizel va paxta yog‘i arzonlashdi

O‘zbekiston Respublikasi tovar-xomashyo birjasida 2025 yil 20 iyun kuni bo‘lib o‘tgan savdolarda asosiy bir qator mahsulotlar narxida keskin o‘zgarishlar qayd etildi. Jumladan, suyultirilgan propan narxi 724,8 ming so‘mni tashkil qilib, 13,1 foizga oshdi. Ushbu mahsulot oy boshidan buyon 22,6 foizga qimmatlagan. Biroq boshqa bir qator muhim tovarlar narxida pasayish kuzatildi. Eng katta tushish ko‘rsatkichi paxta yog‘iga tegishli bo‘lib, u 15,4 foizga arzonlashdi va 14 mln so‘mni tashkil qildi. Shuningdek, paxta tolasi narxi 10,6 foizga, shrot 11,7 foizga kamaydi. Yoqilg‘i bozorida ham pastlash qayd etildi. AI-80 va AI-92 benzinlari narxi mos ravishda 0,1 va 0,2 foizga tushgan bo‘lsa, dizel yoqilg‘isi 4,5 foizga arzonlashdi. Bundan tashqari, sement va polietilen mahsulotlarining ham narxida yengil pasayish qayd etilgan. Bularning barchasi bozordagi talab va taklif, shuningdek, tashqi omillarga bog‘liq ravishda shakllanmoqda. Mutassaddilar savdo dinamikasini kuzatishda davom etmoqda, ayniqsa, yoqilg‘i va oziq-ovqat mahsulotlariga bo‘lgan talab mavsumiy ta’sirlarga sezgir bo‘lib qolmoqda.