Qirg‘iziston migrantlar masalasida Rossiyani sudga berdi

Qirg‘iziston Respublikasi Rossiya Federatsiyasiga nisbatan Yevroosiyo iqtisodiy ittifoqi sudiga rasmiy da’vo arizasi kiritdi. Bu haqda 27-yanvar kuni Qirg‘iziston parlamenti — Jogorku Keneshning ijtimoiy masalalar, sog‘liqni saqlash va mehnat qo‘mitasi yig‘ilishida ma’lum qilindi. Da’vo mehnat muhojirlari va ularning oila a’zolariga tibbiy xizmat ko‘rsatish masalalari bilan bog‘liq.

Yig‘ilishda deputat Gulnara Baatirova Rossiyada ishlayotgan Qirg‘iziston fuqarolari uchun tibbiy sug‘urta polislarini olish va tibbiy xizmatdan foydalanishda jiddiy muammolar mavjudligini ta’kidladi. Uning qayd etishicha, bu masala ijtimoiy himoya nuqtai nazaridan ham, xalqaro kelishuvlar ijrosi jihatidan ham dolzarb hisoblanadi.

Qirg‘iziston Majburiy tibbiy sug‘urta jamg‘armasi rahbari Azamat Mukanov mazkur yo‘nalishda ishlar davom etayotganini bildirdi. Uning so‘zlariga ko‘ra, da’vo Yevroosiyo iqtisodiy ittifoqi doirasida qabul qilingan kelishuvlar shartlariga amal qilinmayotgani bilan bog‘liq.

Mukanovning ta’kidlashicha, YOII kelishuvlariga muvofiq, Rossiya hududida ishlayotgan mehnat muhojirlarigina emas, balki ularning oila a’zolari ham majburiy tibbiy sug‘urta polisi bilan ta’minlanishi kerak. Bu normalar beshta a’zo davlat tomonidan imzolangan xalqaro hujjatlarda belgilab qo‘yilgan.

Ma’lum qilinishicha, Yevroosiyo iqtisodiy ittifoqi sudining ushbu ish bo‘yicha sud majlisi o‘tgan hafta bo‘lib o‘tgan. Qaror esa taxminan ikki hafta ichida e’lon qilinishi kutilmoqda. Sud qarori YOII hududida mehnat muhojirlari huquqlarini qo‘llash amaliyotiga jiddiy ta’sir ko‘rsatishi mumkin.

Eslatib o‘tamiz, avvalroq Rossiya Davlat dumasi chet ellik ishchilar uchun majburiy tibbiy sug‘urta polisini berish qoidalarini qattiqlashtirish to‘g‘risidagi qonunni ma’qullagan edi. Yangi qonunga ko‘ra, mehnat muhojirlari faqat mamlakatda besh yillik sug‘urta stajiga ega bo‘lgan taqdirdagina bepul tibbiy yordam olishlari mumkin.