Qozog‘iston Eron urani masalasida ko‘mak taklif qildi

Qozog‘iston Eron urani bilan bog‘liq masalada ko‘mak berishga tayyorligini ma’lum qildi, ammo yakuniy qaror xalqaro kelishuvlarga bog‘liq. Bu haqda mamlakat Tashqi ishlar vazirligining rasmiy vakili Yerlan Jetibayev ma’lum qildi.
Jetibayevning so‘zlariga ko‘ra, Qozog‘iston Eron yadroviy dasturi atrofidagi vaziyatni diqqat bilan kuzatmoqda va atom energiyasidan faqat tinch maqsadlarda hamda Xalqaro atom energiyasi agentligi nazorati ostida foydalanilishini qo‘llab-quvvatlaydi.

Uning ta’kidlashicha, Qozog‘iston boshqa qator davlatlar bilan birgalikda mazkur masalani hal etishda yordam berishga tayyor, biroq bu faqat muzokaralarda ishtirok etayotgan barcha tomonlar roziligiga bog‘liq.

«Qozog‘istonni ham o‘z ichiga olgan bir qator davlatlar, barcha jalb etilgan tomonlar o‘rtasida tegishli xalqaro kelishuvlarga erishilgan va masala amaliy bosqichga o‘tgan taqdirda, ezgu niyat asosida texnik ko‘mak ko‘rsatishga tayyorligini bildirdi», – dedi Jetibayev.

Qozog‘istondagi uran banki

Shuningdek, u Qozog‘iston hududida MAGATEga tegishli Past boyitilgan uran banki joylashganini eslatdi. Ushbu bank tinch atom dasturlari uchun yadroviy yoqilg‘ining zaxira manbai vazifasini bajaradi.

«Biz o‘z pozitsiyamiz va tayyorligimizni bildirdik. Yana bir bor takrorlayman, bu tegishli kelishuvlarga erishilgan taqdirdagina amalga oshiriladi», – dedi TIV rasmiy vakili.

Oxirgi konferensiya

Yaqinda MAGATE direktori Rafael Grossining Qozog‘istonga tashrifidan so‘ng mamlakat Eron uranini qabul qilishga tayyorligini bildirgan edi.

Avvalroq esa Nyu Yorkdagi BMT shtab-kvartirasida Yadro qurolini tarqatmaslik to‘g‘risidagi Shartnomaning 11-ko‘rib chiqish konferensiyasi yakunlangani xabar qilindi. Qariyb to‘rt hafta davom etgan muhokamalarda turli mamlakatlar delegatsiyalari global yadroviy xavfsizlik kelajagini muhokama qildi, ammo yakuniy hujjat bo‘yicha kelishuvga erisha olmadi.