Qozog‘iston va BAA Jambulda yirik «yashil» energetika loyihasini boshlaydi

2025 yil 6 may kuni Qozog‘iston parlamenti Senatida Qozog‘iston va BAA o‘rtasida «yashil» energetika sohasidagi hamkorlikni mustahkamlovchi xalqaro kelishuv muhokama qilindi. Energetika vaziri o‘rinbosari Sung‘at Yesimxanov taqdimot chog‘ida bu loyiha mintaqadagi eng yirik shamol elektr stansiyalaridan biri bo‘lishini ta’kidladi. Loyiha Masdar xalqaro kompaniyasi hamkorligida amalga oshiriladi. 1 GW quvvatga ega bo‘ladigan shamol elektr stansiyasi yiliga 3,4 milliard kWh energiya ishlab chiqaradi va atmosferaga chiqariladigan SO2 miqdorini 2 mln tonnaga kamaytiradi. 300 MWli energiya zaxira tizimi esa yuqori talab paytida barqaror ta’minotni ta’minlaydi. Investorlar tomonidan 1,4 mlrd dollarlik to‘g‘ridan-to‘g‘ri investitsiya jalb etiladi. Qurilish bosqichida 1000 ta vaqtinchalik ish o‘rni, ishga tushgandan so‘ng esa 100 ta doimiy ish o‘rni yaratiladi. Loyiha doirasida mahalliy mutaxassislar zamonaviy texnologiyalar va malaka oshirish imkoniyatiga ega bo‘ladi. Bundan tashqari, 425 kmli yuqori kuchlanishli liniyalar tortilib, Qozog‘istonning shimol va janubini energiya tarmog‘i orqali bog‘laydi. Yesimxanov so‘zlariga ko‘ra, loyiha mahalliy mahsulot va xizmatlardan foydalanishni ham nazarda tutadi. Ekologik va ijtimoiy standartlarga mos keladigan ushbu loyiha Qozog‘istonning iqlim maqsadlariga qo‘shiladigan muhim hissa bo‘ladi.