Qozog‘iston YeIKga Rossiya ustidan shikoyat qildi

Qozog‘iston hukumati Yevroosiyo iqtisodiy komissiyasiga Rossiya chegarasidagi navbatlar va Rossiya migratsiya qonunchiligiga kiritilgan o‘zgartirishlar tufayli yuzaga kelgan qiyinchiliklar yuzasidan murojaat yubordi. Bu haqda TRT xabar berdi. Hukumat matbuot xizmatiga ko‘ra, Ostona mavjud vaziyatni «tashqi savdoga to‘sqinlik qilayotgan barer» sifatida tan olmoqchi. Bu masala 13 oktyabr kuni Yevroosiyo iqtisodiy komissiyasida (YeIK) va 7 noyabr kuni Qozog‘iston va Rossiya o‘rtasidagi hamkorlik bo‘yicha hukumatlararo komissiya yig‘ilishida muhokama qilinadi. Bayonotning asosiy qismi xorijiy fuqarolarning Rossiyaga kirishining yangi qoidalariga bag‘ishlangan. Amaldagi qonunchilikka ko‘ra, shaxs kirish va chiqishlar sonidan qat’i nazar, kalendar yilida 90 kundan ortiq bo‘lmagan muddatda mamlakatda ro‘yxatdan o‘tmasdan qolishi mumkin. Ilgari bu muddat 180 kun edi. Ushbu qoidalar xalqaro tashishlarni amalga oshiruvchi haydovchilarga ham tegishli. Bundan tashqari, bo‘lish muddati endi Ittifoq davlatiga a’zo bo‘lgan Rossiya va Belarus uchun birgalikda hisoblab chiqiladi. Qozog‘iston hukumati mamlakatda shunga o‘xshash tartib-qoidalar ancha yengillashtirilganini ta’kidladi. Chet el fuqarolari olti oylik muddat ichida 90 kun davomida ro‘yxatdan o‘tmasdan qolishlari mumkin. Ushbu cheklov xalqaro yuk va yo‘lovchi tashish yo‘nalishlarida harakatlanuvchi haydovchilarga taalluqli emas. Ostona ushbu qoidalar xalqaro amaliyotga mos kelishini ta’kidladi. Majlis deputati Bolatbek Najmetdinulining ta’kidlashicha, Rossiyaning yangi qoidalari nafaqat xalqaro tashuvchilarga, balki Yevroosiyo iqtisodiy ittifoqi doirasida faoliyat yurituvchi haydovchilarga ham tegishli.