Shatdaun: AQSH federal hukumati qisman faoliyatini to‘xtatdi

AQSH kecha, 31-yanvar kuni qisqa muddatli bo‘lishi kutilgan hukumat faoliyatining to‘xtab qolish (shutdown) holatiga kirdi. Bunga Kongress davlat muassasalarining katta qismini moliyalashtirish bo‘yicha kelishuvni tasdiqlay olmagani sabab bo‘ldi. Senat 30-yanvar kuni xarajatlar paketiga osongina ovoz berdi, ammo Vakillar palatasi a’zolari shaharda emas edi.

Respublikachi va demokrat qonun chiqaruvchilar immigratsiya nazorati bo‘yicha bahslar hukumatning boshqa faoliyatiga xalaqit bermasligi uchun ish olib bormoqda. Bu o‘tgan kuzdagi vaziyatdan farq qiladi: o‘shanda sog‘liqni saqlash masalasi bo‘yicha ikki partiya o‘rtasidagi keskin tortishuv hukumatning rekord darajada – 43 kunga – yopilishiga olib kelgan va AQSH iqtisodiyotiga taxminan 11 mlrd dollar zarar yetkazgan edi.

Senat tomonidan ma’qullangan kelishuv Ichki xavfsizlik departamentini (DHS) umumiy xarajatlar paketidan ajratishni nazarda tutadi. Bu qonun chiqaruvchilarga Pentagon va Mehnat departamenti kabi idoralarni moliyalashtirishni tasdiqlash imkonini beradi, shu bilan birga federal immigratsiya agentlari faoliyatiga oid yangi cheklovlar muhokama qilinadi. Bu masala Minneapolisda ikki nafar AQSH fuqarosi Imigratsiya va bojxona nazorati xizmati (ICE) agentining o‘qidan halok bo‘lganidan keyin jamoatchilikda katta shov-shuv keltirib chiqargan.

AQSH Kongressi Quyi palatasi – Vakillar palatasi spikeri, palatada juda kichik ustunlikka ega bo‘lgan respublikachilar rahbari Mayk Jonson bugun, 1-fevral kuni seshanba kuniga qadar «DHS»dan tashqari barcha agentliklarni moliyalashtirish, «shundan keyin esa masalani hal qilish uchun ikki hafta davomida halol muzokaralar olib borish»ni maqsad qilganini aytdi.

Qonun loyihasida «DHS»ni ikki haftagacha vaqtincha moliyalashtirish mexanizmi mavjud, ammo butun yillik moliyalashtirishga oid qonun «ICE» faoliyatini o‘zgartirish bo‘yicha kelishuvga erishilmaguncha kutilmoqda. Demokratlar «ICE» uchun islohotlarni talab qilmoqda, jumladan majburiy bodi-kameralar joriy etish, ko‘chma patrullardan va niqoblardan foydalanishni to‘xtatishni.

«Men demokratlar qanday qilib vijdonan «ICE»ni moliyalashtirishni davom ettirish uchun ovoz berishi mumkinligini tushunmayman, agar ular Amerika fuqarolarini o‘ldirayotgan bo‘lsa», – dedi Kaliforniyadan saylangan demokrat kongressmen Ro Xanna «Meet the Press» dasturida.

Jonson esa Tramp ma’muriyati «DHS»ning ayrim amaliyotlarini o‘zgartirishini kutmoqda, biroq «ICE» agentlari niqoblarni o‘z shaxsiy xavfsizligi va oilalarini himoya qilish uchun taqishini ta’kidladi.

«Men ishonchim komilki, bizning bu ishni kamida seshanbaga qadar amalga oshiramiz. Asosiy muammo – barchani shaharga yig‘ish bilan bog‘liq logistika», — dedi spiker AQSHning janubi-sharqida sayohatlarga ta’sir ko‘rsatgan qor bo‘roni ortidan transport muammolari hali ham saqlanib qolayotganiga ishora qilib.