Tojikiston Rossiyadan harbiy yordam so‘raganini rad etdi
Tojikiston Afg‘oniston bilan chegarani qo‘riqlash uchun Rossiya harbiylarini jalb etish muhokama qilingani haqidagi ma’lumotni «yolg‘on» deb atadi.
Tojikiston Tashqi ishlar vazirligi Dushanbening Kollektiv xavfsizlik shartnomasi tashkiloti (KXSHT) bilan Rossiya harbiylarini Afg‘oniston chegarasini qo‘riqlashga jalb etish bo‘yicha muzokaralar olib borayotgani haqidagi xabarlarni rasman rad etdi.
Vazirlik ushbu ma’lumotni yolg‘on va haqiqatga to‘g‘ri kelmasligini ta’kidlab, bunday xabarlar tarqatilishi xalqaro hamjamiyatni chalg‘itishini aytdi. TIV ta’kidlashicha, respublika davlat chegarasini ishonchli himoyalash uchun mustaqil ravishda barcha zarur chora-tadbirlarni ko‘rmoqda.
«Davlat chegarasidagi vaziyat barqaror bo‘lib, Tojikiston Respublikasining vakolatli organlari tomonidan to‘liq nazorat ostida turibdi», - deya ta’kidlandi vazirlik bayonotida.
3-dekabr kuni Reuters axborot agentligi kuch tuzilmalaridagi uchta manbaga asoslanib, Tojikiston hukumati Rossiya harbiylarini Tojikiston-Afg‘oniston chegarasini birgalikda nazorat qilishga jalb etish imkoniyatini muhokama qilayotgani haqida xabar tarqatgan edi. Tojikiston tomonining rasmiy bayonotidan so‘ng Reuters o‘z materialini qaytarib oldi va bu qarorni matnda keltirilgan faktlarni tasdiqlovchi yetarli dalillar yo‘qligi bilan izohladi.
Tojikiston-Afg‘oniston chegarasidagi vaziyat noyabr oyi oxirida keskinlashdi, ikki voqea natijasida Xitoyning besh fuqarosi halok bo‘ldi. 26-noyabr kuni «Shohin SM» kompaniyasining uch xodimi dron hujumi oqibatida, 30-noyabr kuni esa Afg‘oniston hududidan o‘qqa tutilishi oqibatida China Road and Bridge Corporation kompaniyasining ikki xodimi halok bo‘ldi. Xitoy elchixonasi Tojikiston rasmiylari bilan shoshilinch muzokaralar o‘tkazdi va Xitoy korxonalariga chegara hududlaridan xodimlarini evakuatsiya qilishni tavsiya etdi.
2-dekabr kuni Tojikiston va Afg‘oniston tashqi ishlar vazirlari rahbarlari xavfsizlik bo‘yicha qo‘shma qo‘mitalar tuzish va chegarachilar o‘rtasida doimiy aloqalarni yo‘lga qo‘yishga kelishib olishdi. Tomonlar hujumlar uchun javobgarlikni Kobul va Dushanbe o‘rtasidagi ishonchni barbod qilishga urinayotgan «noxolis guruhlar» zimmasiga yukladi.
