Toshkent—Xiva tezyurar poyezd chipta narxi ma’lum bo‘ldi
«Jaloliddin Manguberdi» tezyurar poyezdi 3-maydan qatnay boshlaydi.
Toshkent — Xiva — Toshkent yo‘nalishida «Jaloliddin Manguberdi» nomli yangi yuqori tezlikdagi elektropoyezd 3-maydan qatnovni boshlaydi. Bu haqda O‘zbekiston temir yo‘llari matbuot xizmati ma’lum qildi.
Yangi poyezd ishga tushirilishi natijasida ikki shahar o‘rtasidagi safar vaqti avvalgi 13 soatdan 7 soat 31 daqiqagacha qisqaradi. Poyezd Toshkent markaziy vokzalidan soat 7:00 da jo‘naydi va Xivaga 14:31 da yetib boradi.
Qaytish reysi esa Xivadan soat 7:20 da yo‘lga chiqib, poytaxtga 14:51 da yetib keladi.
Harakat jadvali
Poyezd Toshkentdan Xivaga — seshanba, payshanba va shanba kunlari harakatlansa, Xivadan Toshkentga — chorshanba, juma va yakshanba kunlari yo‘lga chiqadi.
Dastlabki ma’lumotlarga ko‘ra, bir tomonlama chipta narxi 780 ming so‘m etib belgilangan.
Tarkib yettita vagondan iborat bo‘lib, taxminan 390 nafar yo‘lovchiga mo‘ljallangan. Poyezd soatiga 260 km tezlikda harakatlanadi va VIP, biznes hamda ekonom sinflarda xizmat ko‘rsatadi.
Loyiha va rejalar
Ushbu poyezdlar «Hyundai Rotem» kompaniyasidan xarid qilingan bo‘lib, jami oltita poyezd mamlakatga olib kelingan. Qolganlari yil yakuniga qadar yetkazilishi kutilmoqda.
Transport vaziri Ilhom Mahkamov avvalroq bergan bayonotida, kelgusida poyezd qatnovini Nukusgacha uzaytirish rejalashtirilayotganini aytgan edi. Buning uchun hozirda temir yo‘l tarmog‘ini elektrlashtirish ishlari davom etmoqda.
