Tramp: Hindiston endi Erondan emas, Venesueladan neft sotib oladi
Trampning aytishicha, Hindiston Venesuela neftini Eronniki o‘rniga sotib oladi. Vashington Nyu-Dehliga tez orada Venesuelada neft xarid qilishni qaytadan boshlash mumkin bo‘lishini bildirgan.
Hindiston Venesuela neftini Eronniki o‘rniga sotib oladi. Bu haqda AQSH prezidenti Donald Tramp kecha, 31-yanvar kuni Floridadan Vashingtonga ketayotganda «Air Force One» samolyotida ma’lum qildi.
«Biz bu kelishuvni, kelishuv konsepsiyasini allaqachon yakunladik», — dedi AQSH prezidenti.
«Reuters» agentligi ma’lumotlariga ko‘ra, bu Hindistonga Rossiyadan neft import qilishni almashtirishga yordam berish maqsadida qilinmoqda.
Tramp, shuningdek, Xitoy ham AQSH bilan Venesuela neftini sotib olish bo‘yicha kelishuv qila olishi mumkinligini bildirdi.
AQSH nazorati ostida Venesuela neftini sotish
Venesuela neftini qaytadan sotish AQSHning harbiy operatsiyasidan keyin sodir bo‘ldi, yanvar boshida Venesuelaning sobiq prezidenti Nikolas Maduro qo‘lga olingan edi. AQSH nazorati ostida eksport qayta boshlanganidan so‘ng, manbalarga ko‘ra, Venesuelaning «PDVSA» davlat neft va gaz kompaniyasi ishlab chiqarishni ko‘paytirishni boshlagan.
AQSH allaqachon Karakas bilan yangi kelishuv doirasida Venesuela neftini sotishni boshladi. Birinchi kelishuvlardan olingan taxminan 500 mln dollarlik daromad AQSH ma’muriyati nazoratidagi bank hisoblariga joylashtirilmoqda. Kelishuvning umumiy hajmi 2 mlrd dollar deb baholanmoqda, asosiy hisob esa Qatarda ochilgan va u hisob-kitoblar uchun neytral maydon sifatida xizmat qiladi.
29-yanvar kuni Venesuela parlamenti AQSH talablariga muvofiq neft sohasini xususiy investorlar uchun ochish to‘g‘risidagi qonunni qabul qildi.
