Tramp Si Jinpingga maqtovlar yo‘llab, uchrashuvga rozilik berdi

AQSH prezidenti Donald Tramp Xitoy rahbari Si Jinping bilan yaqin ikki hafta ichida Janubiy Koreyada uchrashishini ma’lum qildi. Uning so‘zlariga ko‘ra, uchrashuv 31 oktyabr – 1 noyabr kunlari Gyongjuda bo‘lib o‘tadigan Osiyo-Tinch okeani hamkorlik forumi doirasida amalga oshadi. «Si — juda kuchli lider, ajoyib inson. Uning hayoti haqiqiy katta filmga arziydi», — dedi Tramp Fox News telekanaliga bergan intervyusida. Bu bayonot AQSH-Xitoy munosabatlari keskinlashgan bir paytda yangradi. Ikki mamlakat o‘rtasidagi savdo urushi yarim yildan beri davom etmoqda. 10 oktyabrda Tramp Xitoyga nisbatan 100 foizlik yangi bojlar joriy etilishini e’lon qilgan edi. Bu bilan AQSHning umumiy boj stavkasi 157 foizga yetmoqchi. Bu qarorga Tramp Xitoyning nodir metallar eksportlariga cheklovlar joriy qilganidan so‘ng keldi. Tramp, shuningdek, Xitoy AQSHni «yillar davomida talon-toroj qilib kelganini» ta’kidladi. Ammo u Si Jinping bilan munosabatlar «yaxshi yo‘lga tushishi»ga ishonmoqda. Ma’lumot o‘rnida: Si Jinping 72 yoshda. U Mao Jedongning sobiq safdoshi oilasida tug‘ilgan, ammo yoshligida otasi qatag‘onga uchragani bois Shensidagi og‘ir mehnatga yuborilgan. U yerdan keyin o‘qishga kirib, XKP safiga qo‘shilgan va davlat boshqaruvidagi yo‘lini boshlagan.