Tramp Yevropaning 8 ta davlatiga bojlarni oshirishini ma’lum qildi
AQSH prezidenti Grenlandiya bo‘yicha bergan bayonoti sabab Yevropaning qator davlatlariga nisbatan yangi bojlar joriy etilishini aytdi.
17-yanvar kuni AQSH prezidenti Donald Tramp Grenlandiyani sotib olishga ruxsat berilmaguncha Yevropaning qator davlatlariga qarshi tariflar bosqichma-bosqich oshirilishini ma’lum qildi. Bu bayonot Daniyaga qarashli, ammo avtonom hudud hisoblangan Grenlandiya atrofidagi siyosiy tortishuvni yanada keskinlashtirdi.
Tramp Truth Social ijtimoiy tarmog‘idagi postida 1-fevraldan boshlab Daniya, Norvegiya, Shvetsiya, Fransiya, Germaniya, Niderlandiya, Finlandiya va Buyuk Britaniyadan olib kiriladigan tovarlarga qo‘shimcha 10 foizlik import tariflari qo‘llanilishini yozdi. Ushbu davlatlar avval ham AQSH tomonidan joriy etilgan tariflar ostida bo‘lgan.
Trampning ta’kidlashicha, 1-iyundan boshlab mazkur tariflar 25 foizgacha oshiriladi va AQSH Grenlandiyani sotib olish bo‘yicha kelishuvga erishmaguncha amal qilaveradi.
Bunga javoban, Daniya va Grenlandiya rahbariyati orol sotilmasligini va uning aholisi AQSH tarkibiga qo‘shilishni istamasligini ochiq aytdi. O‘tkazilgan so‘rovnoma natijalariga ko‘ra, AQSH aholisining beshdan bir qismidan kamrog‘i Grenlandiyani qo‘shib olish g‘oyasini qo‘llab-quvvatlamoqda.
Tramp Grenlandiyani AQSH xavfsizligi uchun muhim deb hisoblab, uning strategik joylashuvi va katta mineral zaxiralarini asos qilib kelmoqda. U hatto kuch ishlatish ehtimolini ham istisno etmagan. Shu fonda, Yevropa davlatlari Daniya iltimosiga ko‘ra orolga harbiy kontingent yubordi.
Daniya va Grenlandiyada shanba kuni norozilik namoyishlari bo‘lib o‘tdi. Norozilar hudud kelajagini o‘zi hal qilishi kerakligini ta’kidladi. Yevropa davlatlari esa Daniyani qo‘llab-quvvatlab, NATO a’zosiga qarshi harbiy bosim ittifoqning parchalanishiga olib kelishi mumkinligidan ogohlantirdi.
Daniya tashqi ishlar vaziri Trampning bayonotini kutilmagan deb atadi. Buyuk Britaniya bosh vaziri esa AQSHni ochiq tanqid qilib, ittifoqchilarga nisbatan tariflar joriy etish NATOning jamoaviy xavfsizlik tamoyillariga zid ekanini bildirdi.
Eslatib o‘tamiz, avvalroq Yevropaning 8 davlati Arktika xavfsizligi va Grenlandiya suverenitetini himoya qilishga tayyor ekanini e’lon qilgandi.
