Turkmaniston 2026 yildan rasman mayning va kriptobirjalarni ochadi

Turkmaniston prezidenti Serdar Berdimuhamedov «Virtual aktivlar to‘g‘risida»gi qonunni imzoladi. Yangi huquqiy hujjat 2026 yil 1-yanvardan kuchga kiradi va mamlakatda kriptovalyuta mayningi hamda kriptobirjalar faoliyatini rasman qonuniylashtiradi. Bu Markaziy Osiyodagi juda kam uchraydigan huquqiy yondashuvlardan biri sifatida iqtisodchilar e’tiborini tortdi.

Yangi qonunga ko‘ra, virtual aktivlar Turkmaniston qonunchiligida fuqarolik muomalasidagi obyekt sifatida tan olinadi. Biroq ular valyutaning o‘rnini bosuvchi vosita, to‘lov shakli yoki qimmatli qog‘oz sifatida hisoblanmaydi. Shu tariqa davlat kriptoekotizimni alohida huquqiy segment sifatida belgiladi.

Mayning faqat yuridik shaxslar va yakka tartibdagi tadbirkorlarga ruxsat etiladi. Bu imtiyoz chet el kompaniyalariga ham taalluqli. Mayning uskunalaridan yashirincha foydalanish, boshqa shaxs uskunalarini roziliksiz ishlatish qat’iyan taqiqlanadi. Maqsad — energiya iste’moli ustidan to‘liq nazorat va noqonuniy mayningni cheklash.

Kriptobirjalar esa faqat yuridik shaxs maqomiga ega bo‘lgan holda faoliyat yuritishi mumkin. Ularda mijoz mablag‘lari xavfsizligi, kiberxavfsizlik va shaxsiy ma’lumotlarni himoya qilish bo‘yicha qat’iy talablar joriy etilgan. Birja operatorlari davlat organidan litsenziya olishi va doimiy nazoratdan o‘tishi shart bo‘ladi.

Turkmaniston kompaniyalariga investorlarni jalb qilish maqsadida o‘z tokenlarini chiqarish huquqi beriladi. Biroq har qanday emissiyadan oldin loyiha davlat organida ro‘yxatdan o‘tishi lozim. Bu mexanizm moliyaviy himoya va shaffoflikni ta’minlashga qaratilgan.

Qonunga muvofiq, davlat organlari kriptoaktivlar qiymatining tushib ketishi yoki xizmat provayderlari majburiyatlari uchun javobgar emas. Bozor xavfi butunlay ishtirokchilar zimmasiga yuklanadi.