Ukraina NATOdagi harbiycha fikrlashini o‘zgartirmoqda

Ukrainadagi urush NATO va Yevropa davlatlarining harbiy fikrlashiga tubdan ta’sir ko‘rsatdi. Bu haqda Buyuk Britaniyaning Ukrainadagi elchisi Nil Krompton Kiyev xavfsizlik forumidagi maxsus sessiyada so‘zlab o‘tdi. Uning ta’kidlashicha, Yevropa davlatlari o‘z mudofaa qobiliyatini oshirish va strategik avtonomiyani kuchaytirish zarurligini anglab yetdi.

Krompton Yevropa mamlakatlarida mudofaa siyosati sohasida «davrni belgilaydigan o‘zgarishlar» ketayapti, deb baholadi. Germaniya va boshqa YI davlatlarida armiyaga investitsiyalar keskin oshirilgani, Ukraina xavfsizligi Yevropa xavfsizligining ajralmas qismi ekani anglanayotganini ko‘rsatadi.

Elchining fikricha, Yevropa AQSH bilan strategik aloqalarni saqlagan holda, Rossiyadan kelayotgan tahdidlarga tez va mustaqil javob berish imkoniyatini yaratishi kerak.

Xavfsizlik kafolatlari

Nil Krompton Britaniya Fransiya va boshqa hamkorlar bilan birga Ukraina uchun xavfsizlik kafolatlarini muvofiqlashtirayotganini ta’kidladi. Bu jarayon «ko‘ngillilar koalitsiyasi» doirasida amalga oshirilmoqda va u faqat sanksiyalar bilan cheklanib qolmaydi.

Uning so‘zlariga ko‘ra, gap qurolli kuchlarni modernizatsiya qilish, oddiy armiyalarni kuchaytirish va yadroviy tiyib turish salohiyatini qayta ko‘rib chiqish haqida bormoqda. «Yuz bergan voqealar Britaniyada yadroviy tiyib turish va oddiy harbiy qudratni tiklash bo‘yicha strategik yondashuvni tubdan o‘zgartirdi», dedi elchi.

Krompton muzokaralar masalasiga ham to‘xtalib, ular faqat Ukraina yangi agressiyaga qarshi tezkor va kuchli javob bo‘lishiga ishonch hosil qilgan taqdirdagina imkonli ekanligini qayd etdi.

Urush saboqlari

Ukrainaning harbiy tajribasi NATO uchun muhim manbaga aylanganini AQSH generali Devid Petreus ham ta’kidladi. U Ukrainadagi urush butun dunyo armiyalari uchun o‘zgarishlar katalizatori bo‘lganini aytdi.

Petreus ayniqsa pilotsiz parvoz tizimlari, qo‘shinlarni tashkil etish va innovatsiyalarni joriy qilish sohasida Ukraina tajribasi tez o‘zlashtirilishi kerakligini qayd etdi. U Ukrainada alohida pilotsiz parvoz tizimlari qo‘shinlari tashkil etilganini kelajak urushlar modeli sifatida baholadi.