XVJdan yaxshilangan prognoz: jahon iqtisodiyoti 2026-yilda 3,3 foizga o‘sadi
Xalqaro valuta jamg‘armasi 2026-yil uchun jahon iqtisodiy o‘sish prognozini oshirdi. Asosiy drayverlar — sun’iy intellekt va biznesning tariflarga moslashuvi.
© Foto: Bloomberg Xalqaro valuta jamg‘armasi (XVJ) 2026 yil uchun jahon iqtisodiyoti o‘sishi bo‘yicha prognozini yana yaxshiladi. Jamg‘arma tahlilchilariga ko‘ra, global iqtisodiyot savdo ziddiyatlari va tarif bosimlariga qaramay barqarorlik namoyon qilmoqda, sun’iy intellektga yirik sarmoyalar esa yangi samaradorlik manbaiga aylanyapti, deb xabar beradi «Reuters».
XVJning yangilangan «World Economic Outlook» hisobotida jahon yalpi ichki mahsuloti 2026 yilda 3,3 foizga o‘sishi prognoz qilingan. Bu oktabr oyidagi baholashdan 0,2 foiz punktga yuqori. 2025 yil yakunlari bo‘yicha ham o‘sish sur’ati 3,3 foiz darajasida bo‘lishi kutilmoqda.
XVJ bosh iqtisodchisi Piyer-Olivye Gurinsha jahon iqtisodiyotining siyosiy zarbalarga chidamliligini alohida ta’kidladi:
«Biz global o‘sish yetarlicha barqaror qolganini ko‘ryapmiz. Iqtisodiyot 2025 yildagi savdo va tarif shoklarini amalda yengib o‘tdi va avval kutilganidan yaxshiroq natijalarni namoyon qilmoqda».
Asosiy o‘sish omillari: sun’iy intellekt
Prognozning yaxshilanishida asosiy hissa AQSH hissasiga to‘g‘ri keladi. Amerika iqtisodiyoti 2026 yilda 2,4 foizga o‘sishi kutilmoqda — bu avvalgi prognozdan 0,3 foiz punktga yuqori.
Bu o‘sish, avvalo, sun’iy intellekt infratuzilmasiga yo‘naltirilgan ulkan investitsiyalar bilan bog‘liq: data-markazlar qurilishi, yuqori quvvatli chiplar xaridi va energetika tarmoqlarini kengaytirish.
Mintaqalar kesimida
Xitoy: 2026 yil uchun prognoz — 4,5 foiz. Bu 2025 yildagi 5,0 foizlik ko‘rsatkichdan past, ammo avvalgi baholashlarga nisbatan yaxshiroq. Pekin eksportni Janubi-Sharqiy Osiyo va Yevropa bozorlariga qayta yo‘naltirishga muvaffaq bo‘ldi.
Yevrozona: 1,3% o‘sish kutilmoqda. Germaniyada davlat xarajatlarining ortishi, Ispaniya va Irlandiya iqtisodiyotidagi kuchli dinamika ijobiy ta’sir ko‘rsatmoqda.
Inflatsiya: Jahon miqyosida inflatsiya 2025 yildagi 4,1 foizdan 2026 yilda 3,8 foizgacha pasayishi kutilmoqda. Bu markaziy banklarga pul-kredit siyosatini yumshatish uchun qo‘shimcha imkoniyat yaratadi.
