Zelenskiy asosiy bahsli hududlar masalasida Putin bilan uchrashuvga tayyor

Ukraina prezidenti Volodimir Zelenskiy Rossiya prezidenti Vladimir Putin bilan shaxsiy uchrashuv o‘tkazishga tayyor. Bu haqda Ukraina tashqi ishlar vaziri Andriy Sibiga «Yevropeyskaya pravda»ga bergan intervyusida ma’lum qildi. Vazirning aytishicha, bunday uchrashuv hududlar masalasi va Zaporijjya atom elektr stansiyasi ustidan nazorat kabi hal etilmagan asosiy nuqtalarni muhokama qilish uchun zarur.

«Aynan shu masalalarni yechish uchun prezident Putin bilan uchrashuvga tayyor», — dedi Sibiga.

Ushbu ikki masala tinchlik jarayoni doirasida hali ham kelishilmagan holatda qolmoqda. Shu bilan birga, vazir Rossiya tashqi ishlar vaziri bilan alohida uchrashuv o‘tkazishni maqsadga muvofiq deb hisoblamasligini bildirdi, chunki amaldagi muzokara guruhlaridan tashqari «parallel treklar» yaratish shart emas.

Muzokaralar dinamikasi

Sibiganing ma’lum qilishicha, muzokaralar davomida o‘t ochishni to‘xtatish shartlari, shuningdek, ehtimoliy sulhni monitoring qilish va verifikatsiya qilish mexanizmlari bo‘yicha predmetli muhokamalar o‘tkazilgan. Ushbu jarayon 23–24-yanvar kunlari Abu Dabida bo‘lib o‘tgan Ukraina, Rossiya va AQSH o‘rtasidagi ilk uch tomonlama konsultatsiyalardan so‘ng faollashgan.

Uchrashuvda ishtirok etgan AQSH prezidenti maxsus vakili Stiv Uitkoff muzokaralarni konstruktiv deb baholadi va tomonlar muloqotni davom ettirishga tayyor ekanini tasdiqladi. Keyingi uchrashuv 1-fevralga belgilangani ma’lum qilindi. Ukraina tomoni ham ushbu maslahatlashuvlarni mazmunli deb atadi.

Hududlar masalasi ochiq qolmoqda

Zelenskiyning so‘zlariga ko‘ra, muzokaralar davomida harbiy va siyosiy masalalarni qamrab olgan 20 punktli tinchlik rejasi batafsil muhokama qilingan va bahsli nuqtalar soni qisqargan. Biroq hududlar masalasi hali ham ochiq qolmoqda: Rossiya Donbassni to‘liq o‘z nazoratiga olishni talab qilmoqda, holbuki bu hududni to‘rt yillik urush davomida to‘liq egallay olmagan.

Avvalroq Putin Zelenskiy bilan uchrashuvga tayyorligini bildirgan, ammo uni Moskvada o‘tkazishni taklif qilgan edi. Ukraina prezidenti esa bunday formatni rad etib, uchrashuvni Kiyevda o‘tkazishni taklif qildi.

Kiyev rasmiylariga ko‘ra, Rossiya tomonining bunday takliflari AQSH uchun muloqotga tayyorlik ko‘rsatishdan boshqa maqsadni ko‘zlamaydi. Shu bilan birga, Moskva Zelenskiyning legitimligiga shubha bildirib keladi, Ukraina esa urush sharoitida saylov o‘tkazish Konstitutsiya bilan taqiqlanganini ta’kidlaydi.