O‘zbekistonda poyezdlar harakati jadvaliga o‘zgarish kiritildi

9-sentyabrdan e’tiboran bir qator yo‘nalishlarda poyezdlar jadvalida yangi vaqtlar qo‘llaniladi, deya xabar berdi «Temiryo‘lekspress». Yangilangan jadvalga ko‘ra, «Toshkent — Buxoro» va «Buxoro — Toshkent» yo‘nalishlarida bir nechta reyslarning ketish va kelish vaqtlari o‘zgardi. Shuningdek, «Toshkent — Qarshi», «Toshkent — Shahrisabz» hamda «Toshkent — Samarqand» yo‘nalishlari uchun ham yangi soatlar belgilandi. Jumladan, 778-sonli «Toshkent — Buxoro» poyezdi endi soat 06:08 da yo‘lga chiqib, 10:14 da Buxoroga yetib boradi. Shu kuni 777-sonli «Buxoro — Toshkent» poyezdi esa 18:00 da yo‘lga chiqib, 22:08 da manzilga yetishi ko‘zda tutilgan. 764-sonli «Toshkent — Qarshi» reysi 06:33 da jo‘nab, 10:07 da yetib boradi. Qaytib keluvchi 763-sonli «Qarshi — Toshkent» poyezdi esa 17:29 da yo‘lga chiqib, 21:04 da poytaxtga yetib keladi. Bundan tashqari, 774-sonli «Toshkent — Shahrisabz» poyezdi 06:33 da ketib, 11:12 da yetib boradi. 766-sonli «Toshkent — Samarqand» reysi esa 08:00 da jo‘nab, 10:25 da Samarqandga yetishi belgilangan. Yangi jadval bo‘yicha «Toshkent — Buxoro» yo‘nalishida yana bir nechta qo‘shimcha vaqtlar joriy etildi. Xususan, 768-sonli reys 07:30 da, 770-sonli reys 08:30 da, 772-sonli reys esa 19:41 da yo‘lga chiqadi. Ularga mos ravishda qaytib keluvchi poyezdlar vaqti ham o‘zgartirilgan. «Temiryo‘lekspress» ma’lumotiga ko‘ra, o‘zgarishlar yo‘lovchilarning talab va takliflaridan kelib chiqib amalga oshirilgan.