Qirg‘izistonda qalin qor tufayli ko‘plab chorva mollari nobud bo‘ldi

Qirg‘izistonning Norin va Issiqko‘l viloyatlaridagi tog‘li yaylovlarida qalin qor va keskin sovuq oqibatida ko‘plab mayda shoxli chorva mollari nobud bo‘ldi. Bu haqda mamlakat Suv resurslari, qishloq xo‘jaligi va qayta ishlash sanoati vazirligi matbuot xizmati ma’lum qildi.

Qayd etilishicha, hayvonlarning o‘limi yuqumli kasalliklar bilan bog‘liq emas. Asosiy sabab sifatida ob-havoning keskin sovishi ko‘rsatilgan.

Dastlabki ma’lumotlarga ko‘ra, junlari yaqindagina qirqilgan qo‘ylar baland tog‘li yaylovlarga haydalgani sababli past haroratga dosh bera olmagan. Ozuqa yetkazib berish va utilizatsiya ishlari
Cho‘ponlarni qo‘llab-quvvatlash maqsadida mahalliy hokimiyat va Favqulodda vaziyatlar vazirligi xodimlari tomonidan uzoq yaylovlarga uzluksiz pichan va ozuqa yetkazib berildi.

Veterinariya xizmati hududda epizootik vaziyat barqaror ekanini bildirgan.
Hozirda Jeti-O‘guz tumanida ob-havo mo‘tadillashib, qor to‘liq erigan. Nobud bo‘lgan hayvonlarning jasadlari ozuqa tashigan mashinalarda aholi punktlariga olib tushilmoqda. Shundan so‘ng ular veterinariya-sanitariya talablari asosida utilizatsiya qilinadi.