«Tesla» motor va pedalsiz bolalar velosipedini sotuvga chiqardi
225 dollarlik mazkur yangi mahsulot 2 yoshdan 5 yoshgacha bo‘lgan bolalar uchun mo‘ljallangan bo‘lib, u faqat oyoq bilan itarib harakatlantiriladi.
«Tesla» kompaniyasi muxlislari uzoq vaqt davomida kutgan elektron velosiped o‘rniga, motorsiz va pedalsiz bolalar velosipedini sotuvga chiqardi. Bu haqda «Electrek» nashri xabar berdi.
«Balance Bike for Kids» (Bolalar uchun muvozanat velosipedi) nomli yangi mahsulot «Tesla»ning onlayn do‘konida 225 dollardan sotuvga qo‘yilgan bo‘lib, u 2 yoshdan 5 yoshgacha bo‘lgan bolalarga mo‘ljallangan.
Velosipedda hech qanday harakatlantiruvchi tizim mavjud emas — bolalar uni faqat oyoqlari bilan itarib harakatlantirishadi, bu esa velosipedining asosiy maqsadi hisoblanadi.
Texnik xususiyatlari va narx
Mazkur velosiped yengil magniyli korpusga va besh xil balandlikda moslashtiriladigan o‘rindiqqa ega.
Uning yon tomonida «Tesla» yozuvi, oldingi qismida esa «T» logotipi tushirilgan. Talablarga ko‘ra, velosipeddan foydalanuvchi bolaning eng kam oyoq uzunligi 13,7 dyuymni, maksimal vazni esa 77 funtni tashkil qilishi kerak.
Mahsulotni yig‘ish uchun kerakli asbob-uskunalar jamlanmaning ichiga kiritilgan.
Muxlislar bir necha yillardan beri kompaniyadan elektron velosiped, xususan, mish-mishlarga sabab bo‘lgan «Tesla Model B» modelini ishlab chiqarishni so‘rab kelishayotgan edi. Ilon Mask bu g‘oyani bir necha bor rad etgan bo‘lsa-da, ba’zida uni qo‘llab-quvvatlagan holatlari ham bo‘lgan.
Narx masalasida, odatiy muvozanat velosipedlari bozorda 50-120 dollar, magniy korpusli «Hornit AIRO» esa 73 dollar atrofida sotiladi. Biroq, «Tesla» o‘z mahsulotini premium toifadagi velosipedlar bilan bir qatorda baholagan. Uning 225 dollarlik bahosi «Woom 1» (249 dollar) va «Strider 14x Sport» (220 dollar) modellari narxiga yaqindir.
Hozirda «Tesla» tomonidan haqiqiy elektron velosiped ishlab chiqarilishi kutilayotgan bir paytda, «BMW» kabi boshqa avtoishlabchiqaruvchilar ushbu bozorga kirishga ulgurgan. Shuningdek, elektromobillar ishlab chiqaruvchi «Rivian» brendi ham o‘ziga xos dizayn va xususiyatlarni taklif etuvchi «Also» nomli yangi elektron velosiped kompaniyasini tashkil qilgan.
