Банкларда «Золотая Корона» ўтказмалари қайта тикланмоқда
Аввалроқ Европа Иттифоқи санкциялари ортидан Ўзбекистондаги 15 дан ортиқ банк хизматни вақтинча тўхтатганди.
Агробанк ва Бизнесни ривожлантириш банкида «Золотая Корона» орқали халқаро пул ўтказмаларини қабул қилиш қайта тикланди. Бу ҳақда банклар матбуот хизмати маълум қилди.
Энди мижозлар ушбу тизим орқали хориждан юборилган маблағларни яна одатий тартибда олишлари мумкин. Банклар ҳозирча пул жўнатиш имконияти ҳам қайта тикланганига аниқлик киритмаган.
Аввалроқ Европа Иттифоқи 21-санкциялар пакети доирасида «Золотая Корона» оператори — «Платёжный Центр»ни санкциялар рўйхатига киритганди. Шундан сўнг, Ўзбекистондаги банклар бирин-кетин ушбу тизим орқали пул ўтказмаларини амалга оширишни тўхтата бошлади.
Жумладан, Агробанк ва Бизнесни ривожлантириш банки ҳам хизмат вақтинча тўхтатилганини эълон қилганди. Умуман, «Золотая Корона» билан ишлашни чеклаган банклар сони 15 тадан ошган.
Марказий банк вакили Отабек Тожиддинов санкциялар тизимнинг ўзига эмас, унинг операторига нисбатан қўлланганини айтганди.
Шу сабабли «Золотая Корона»ни санкцияга тушмаган бошқа техник операторга ўтказиш бўйича ишлар олиб борилаётгани маълум қилинган.
Хизмат яқин вақтларда бошқа банкларда ҳам босқичма-босқич қайта тикланиши кутилмоқда.
