Maduro joni omon qolishi evaziga iste’foni muhokama qilmoqda — The Atlantic
Rasmiy Vashington Venesuela prezidenti Nikolas Maduro iste’fosi evaziga xavfsizlik kafolatlari berish imkoniyatini muhokama qilmoqda. Bu siyosiy o‘tishni nazoratli qilish maqsadida amalga oshirilmoqda.
The Atlantic nashrining o‘z manbalariga tayanib yozishicha, AQSH Venesuela prezidenti Nikolas Maduro bilan uning nazoratli iste’fosi yuzasidan muzokaralar olib bormoqda. Bu shartnoma doirasida Maduroga shaxsiy xavfsizlik kafolatlari, amnistiya, ushlangan amerikaliklarni ozod qilish, unga qarshi mukofotlarni bekor qilish va uchinchi mamlakatda qabul qilinish sharoitlari taklif etilishi mumkin.
Manbalarning ta’kidlashicha, Maduro mamlakatni tark etishga tayyorligini bildirgan, agar Vashington uni «diktator» yoki «narkobaron» sifatida atashni to‘xtatsa. Ayrim rasmiylarning so‘zlariga ko‘ra, u bilan barcha masalalar yuzasidan kelishuvga erishish mumkin. Bunday ssenariy tarafdorlari uni potensial qonli to‘qnashuvlarning oldini olish imkoniyati sifatida baholamoqda.
Shu bilan birga, AQSH prezidenti Donald Tramp diplomatik bosim bilan birgalikda harbiy kuch tahdidini ham saqlab qolmoqda. AQSH Venesuela yaqinida 1962 yildan buyon eng yirik harbiy guruhni joylashtirdi: Gerald R. Ford avianosetsidan tashqari 8 ta harbiy kema, 10 ming askar, qiruvchi uchoqlar va atom suv osti kemasi jalb qilingan.
Muzokaralarda AQSHning maxsus vakili Richard Grenell faol ishtirok etmoqda — u Karakas bilan to‘g‘ridan to‘g‘ri aloqalarni qayta tikladi va qator amerikaliklarni ozod qilinishiga yordam berdi. Shu bilan birga, davlat kotibi Marko Rubio Maduroni narkokartellar va noqonuniy migratsiya orqali AQSH uchun tahdid deb atab, qattiqroq choralarni talab qilmoqda.
Ayni paytda, MAGA harakati ichida intervensiya g‘oyasiga qarshi kayfiyat kuchaymoqda. Ularning fikricha, Venesuelaga bostirib kirish «America First» prinsipiga zid va boshqa mamlakat ishlariga aralashish hisoblanadi.
