Талон-торож ва фирибгарлик жиноятлари учун жазо чоралари кучайтирилди
Энди талон-торож ва фирибгарликда айбланганлар зарарни тўлиқ қопламасдан туриб муддатидан олдин шартли озодликка чиқа олмайди.
© istockЎзбекистон Жиноят кодексига талон-торож ва фирибгарлик жиноятлари бўйича қатор ўзгартишлар киритилди. Бу ҳақда Президент 22-июн куни имзолаган қонун билан белгилаб қўйилди.
Энди ўзлаштириш ёки растрата қилиш йўли билан талон-торож қилганлик, шунингдек фирибгарлик учун ҳукм қилинган шахслар етказилган зарарни тўлиқ қопламаган бўлса, жазодан муддатидан илгари шартли равишда озод қилинмайди.
Янги тартиб мазкур тоифадаги жиноятлар учун жавобгарликни кучайтириш ва етказилган зарарнинг қопланишини таъминлашга қаратилган. Қонун расман эълон қилинган кун, 23-июндан бошлаб кучга кирди.
Мансабдорлар учун оғирроқ
Қонун билан ўзлаштириш ёки растрата қилиш йўли билан талон-торож қилиш жиноятини мансаб мавқеидан фойдаланиб содир этганлик учун жазо ҳам оғирлаштирилди.
Аввал бундай қилмиш учун энг кўпи билан 5 йилгача озодликдан маҳрум қилиш жазоси тайинланиши мумкин эди. Янги таҳрирга кўра, мазкур жиноят учун максимал жазо 10 йилгача озодликдан маҳрум қилишни ташкил этади.
Шунингдек, хизмат мавқеидан фойдаланган ҳолда фирибгарлик содир этган шахсларга нисбатан ҳам жазо кучайтирилди. Илгари бу жиноят учун 8 йилгача озодликдан маҳрум қилиш жазоси қўлланилган бўлса, эндиликда максимал муддат 10 йил этиб белгиланди.
Шу билан бирга, қонунчиликдаги айрим имтиёзли нормалар ўз кучини сақлаб қолмоқда. Хусусан, Жиноят кодексидаги зарарни қоплаш билан боғлиқ қоида бекор қилинмади.
Амалдаги тартибга кўра, етказилган моддий зарар тўлиқ қопланган тақдирда айрим ҳолатларда озодликни чеклаш ёки озодликдан маҳрум қилиш жазоси қўлланилмаслиги мумкин. Бу норма талон-торожга оид 167-модда ҳамда фирибгарликка оид 168-моддага нисбатан ҳам татбиқ этилади. Шу боис янги қонун жазони қаттиқлаштирган бўлса-да, зарарни тўлиқ қоплаган шахслар учун жавобгарликни енгиллаштирувчи механизм сақланиб қолди.
Эслатиб ўтамиз, аввалроқ коррупцияга оид жиноятларни содир этишда айбдор деб топилган шахслар Коррупцияга оид жиноятларни содир этишда айбдор деб топилган шахсларнинг электрон реестрига киритилиши ҳақида хабар берган эдик.
