Энди пенсияни онлайн тарзда нақд пул шаклига ўтказиш мумкин
Пенсия жамғармаси my.gov.uz порталида пенсияни нақд шаклга ўтказиш бўйича онлайн хизматни йўлга қўйди.
Ўзбекистонда пенсия тўловларини бошқаришда яна бир муҳим қадам қўйилди. Пенсия жамғармаси томонидан мй.гов.уз портали орқали пенсияни нақд пул шаклига ўтказиш бўйича онлайн хизмат ишга туширилди. Янги имконият фуқароларни ортиқча ҳужжатбозлик ва идораларга бориш заруратидан халос қилиб, пенсия масаласида масофавий хизматлар қамровини кенгайтиради.
Энди пенсия олувчилар туман ёки шаҳар пенсия бўлимларига шахсан мурожаат қилмасдан, барча жараённи электрон тарзда амалга ошириши мумкин. Бу, айниқса, ёши катта фуқаролар ва ҳаракатланиши чекланган шахслар учун қулайлик яратади. Хизмат пенсия тизимида рақамлаштириш жараёнлари изчил давом этаётганини кўрсатади.
Қандай қилиб онлайн шаклга ўтказиш мумкин?
Пенсияни нақд шаклга ўтказиш учун ариза берувчи Ягона интерактив давлат хизматлари порталида рўйхатдан ўтиши ёки мавжуд аккаунти орқали авторизациядан ўтиши керак. Шундан сўнг «Пенсия тўловини нақд пул шаклига ўтказиш» хизматини танлаб, электрон сўров юборилади. Муҳими, хизмат бепул бўлиб, қўшимча ҳужжатлар тақдим этиш талаб этилмайди.
Ўзбекистонда қанча фуқаро пенсия олади?
Рақамлар пенсия тўловларида банк карталари устунлигини кўрсатмоқда. Молия вазирлиги ҳузуридаги Пенсия жамғармаси маълумотларига кўра, мамлакатда 4,2 миллион нафар фуқаро пенсия олувчи сифатида рўйхатга олинган. Улардан 3,8 миллион нафари пенсия маблағларини банк пластик карталари орқали қабул қилади, бу эса умумий пенсия олувчиларнинг 89 фоизига тўғри келади.
