Хорижий тил ўқитувчилари мажбуран ишдан бўшатиляпти — Меҳнат инспекцияси
Давлат меҳнат инспекцияси чет тили ўқитувчиларига ойлик бермай, мажбуран ишдан бўшатётган иш берувчиларни огоҳлантирди.
Ўзбекистонда чет тилларидан дарс берувчи ўқитувчиларга нисбатан меҳнат қонунчилигига зид ҳолатлар кўпаймоқда. Давлат меҳнат инспекциясига келиб тушаётган мурожаатларда айрим иш берувчилар устозларга иш ҳақи ҳисобламай қўйгани, уларни ишдан четлатгани ёки мажбуран ариза ёздириб, ишдан бўшатгани қайд этилмоқда. Инспекция бу каби амалиётларни очиқдан-очиқ қонунбузарлик деб баҳолади.
Меҳнат инспекцияси маълум қилишича, ҳар бир аниқланган ҳолат бўйича белгиланган тартибда чора кўрилади. Қонунбузар иш берувчиларга нисбатан жавобгарлик чоралари қўлланиши, ўқитувчиларнинг меҳнат ҳуқуқлари тикланиши таъминланиши айтилди. Шунингдек, шундай вазиятга дуч келган фуқаролар инспекцияга мурожаат қилишга чақирилди.
Мазкур муаммо сўнгги йилларда чет тил ўқитувчиларига қўйилаётган талаблар билан боғлиқ. Ҳукумат 2021 йилдан бошлаб чет тилдан дарс берувчи ўқитувчилар камида B2 даражадаги миллий ёки халқаро сертификатга эга бўлишини шарт қилиб қўйган. Бу талаб Вазирлар Маҳкамаси қарори билан мустаҳкамланган.
Қарор ижроси дастлаб 2024 йилга белгиланган эди. Аммо барча ўқитувчилар белгиланган муддатда сертификат ола олмагани сабаб талаб аввал 2025 йил кузига, кейин эса яна кечиктирилиб, 2026 йил 1 январгача амал қилиш муддати узайтирилди. Шу даврда сертификатга эга бўлмаган ўқитувчиларга ишлашга рухсат берилган.
Шунга қарамай, амалда айрим ҳудудларда ўқитувчилар билан тузилган меҳнат шартномалари бекор қилинмоқда. 2025 йил июл ойида Касаба уюшмалари томонидан сертификати йўқ ўқитувчиларни ишдан бўшатмаслик бўйича тегишли идорага таклиф киритилган. Вазирлик эса сертификатга эга бўлмаган ўқитувчиларни ишдан бўшатиш бўйича расмий кўрсатма берилмаганини маълум қилган.
