Трамп Европа раҳбарларига АҚШнинг янги харитасини кўрсатди
У харитада АҚШни учта давлат ҳудуди билан кенгайтирган.
АҚШ президенти Доналд Трамп Европа етакчилари билан учрашув чоғида АҚШнинг янги харитаси акс этган тасвирни улашди. Унда Канада, Гренландия ва Венесуэла АҚШ ҳудуди сифатида кўрсатилган бўлиб, сурат сунъий интеллект ёрдамида таҳрирлангани тахмин қилинмоқда.
Трамп ушбу тасвирни Truth Social платформасида жойлаштирган. У 2025 йил август ойида Вашингтонга ташриф буюрган Европа етакчилари — Эммануэл Макрон, Кир Стармер ва Урсула фон дер Ляйен билан олинган фотосуратнинг қайта ишланган варианти экани айтилмоқда.
Канада ва Венесуэла бўйича аввалги баёнотлар
2025 йил январда ҳокимиятга қайтганидан бери Трамп Канада ҳақида бир неча бор кескин баёнотлар бериб, уни АҚШнинг 51-штати сифатида тасаввур қилиш мумкинлигини билдирган. Шунингдек, у аввалроқ ўзини «Венесуэла президенти вазифасини бажарувчи» сифатида акс этган тасвирни ҳам жойлаштирган эди.
Гренландия атрофидаги даъволар ва бож таҳдидлари
Президентнинг пости Гренландия масаласи атрофидаги эски даъволарни яна кун тартибига олиб чиқди. Трамп Данияга қарашли, ўзини ўзи бошқарадиган ҳудуд бўлган Гренландияни миллий хавфсизлик нуқтаи назаридан АҚШ назоратига олиш зарурлигини таъкидлаб келади. У бу масалада ҳарбий куч ишлатиш эҳтимолини ҳам инкор этмаган ва бунга қаршилик қилаётган Европа иттифоқчиларига нисбатан божхона тўловлари билан таҳдид қилган.
Европа етакчилари Дания ва Гренландия билан бирдам эканини билдириб, АҚШ баёнотларини қораламоқда. Трамп эса агар Гренландия «тўлиқ сотилмаса», 1 февралдан айрим Европа давлатларига 10 фоиз, 1 июндан эса 25 фоизлик бож жорий этишини айтган.
