Онлайн тўлов иловаларига кириш талаблари кучайтирилади
Янги талаблар онлайн фирибгарлик хавфини камайтириш ва фойдаланувчиларнинг молиявий хавфсизлигини оширишга қаратилган.
Ўзбекистонда банклар ҳамда онлайн тўлов мобил иловалари орқали амалга ошириладиган операциялар учун хавфсизлик талаблари кучайтирилди. Адлия вазирлиги томонидан давлат рўйхатидан ўтказилган тегишли низом онлайн фирибгарликка қарши қўшимча чекловлар жорий этилишини назарда тутади. Янги қоидалар «Click», «Paynet», «Uzumbank» каби мобил тўлов хизматларига ҳам тааллуқли.
Аккаунт ва шахсни аниқлаш талаблари
Низомга мувофиқ, мобил иловада рўйхатдан ўтган фойдаланувчи аккаунтига фақат ўзига ёки яқин қариндошларига тегишли бўлган банк ҳисобварағи, банк картаси ва электрон ҳамёнларни бириктириши мумкин.
Шунингдек, ушбу аккаунт орқали P2P ўтказмаларини амалга ошириш ҳам шу чекловлар асосида рухсат этилади. Рўйхатдан ўтиш жараёнида фойдаланувчининг телефон рақами билан ЖШШИР'и мос келиши текширилади ва мослик аниқланмаган тақдирда аккаунт очиш ёки банк картасини бириктиришга йўл қўйилмайди.
Кредит ва тўлов ташкилотлари биометрик идентификация жараёнида ҳаётийлик факторларини аниқлаши шарт. Яъни фақат сурат орқали шахсни тасдиқлаш имконияти истисно қилинади, бу эса сохта аккаунтлардан фойдаланиш хавфини камайтиришга қаратилган.
Кириш, тасдиқлаш ва қурилмани алмаштириш
Янги қоидаларга кўра, телефонга юборилган бир марталик SMS-код уч марта нотўғри киритилган тақдирда, фойдаланувчининг мобил иловадаги ҳаракатлари 15 дақиқага вақтинча чекланади.
Агар аккаунтга бошқа қурилмадан кириш ёки паролни қайта тиклаш амалга оширилса, ушбу аккаунтга боғланган барча банк карталари автоматик тарзда мобил иловадан чиқариб юборилади. Бундан ташқари, мазкур қурилмада банк карталари бўйича молиявий операциялар тарихи ҳам ўчирилади.
Шу билан бирга, банк карталарини мобил иловаларга қайта бириктириш фақат биометрик идентификациядан ўтган ҳолда амалга оширилиши белгиланди. Бу талаблар фойдаланувчилар маблағларини ҳимоя қилиш ва онлайн тўловларда хавфсизлик даражасини оширишга хизмат қилади.
Эслатиб ўтамиз, аввалроқ онлайн кредит фирибгарлиги қурбонлари жабрланувчи деб топилса, улардан қарз ва фоизларни ундириш бекор қилиниши ҳақида хабар бергандик.
