Путин Украина учун АҚШда музлатилган пуллардан 6 млрд доллар бермоқчи

Россия президенти Владимир Путин АҚШда музлатилган Россия захираларинринг бир қисмини Украина ҳудудларини тиклаш учун ишлатишга тайёр эканини билдирди. Хавфсизлик кенгаши билан ўтказилган йиғилишда у гап тахминан 6 млрд доллар ҳақида кетаётганини айтди. Путиннинг сўзларига кўра, ҳатто тинчлик шартномаси тузилмасидан олдин ҳам Москва музлатилган активлари ҳисобидан 1 млрд долларни Трамп ташаббуси билан тузилаётган «Тинчлик кенгаши»га ўтказиши мумкин.

У қолган маблағлар Россия ва Украина ўртасида тинчлик битими имзолангандан кейин жанглардан зарар кўрган ҳудудларни қайта тиклашга сарфланиши мумкинлигини таъкидлади. Бу масала АҚШ маъмурияти вакиллари билан муҳокама қилинаётгани ҳам айтилди.

АҚШ ва «Тинчлик кенгаши»

«Reuters» агентлигининг баҳолашича, Украинада уруш бошланганидан кейин АҚШда Россиянинг тахминан 7 млрд долларлик захиралари музлатилган. Путин тилга олган «Тинчлик кенгаши» ғояси эса АҚШ президенти Доналд Трамп ташаббуси ҳисобланади.

Аввалига тузилма Ғазо секторини бошқариш учун мўлжалланган эди, аммо «Financial Times»нинг ёзишича, низом кенгроқ ваколатларни — турли можароли ҳудудларда тинчликка кўмаклашишни назарда тутади. Нашрга кўра, Трамп маъмурияти бу кенгашни БМТга муқобил тузилма ва Украина бўйича эҳтимолий келишув ижросини назорат қилиш воситаси сифатида кўриб чиқмоқда.

Халқаро чақириқлар ва шартлар

«Тинчлик кенгаши»га қўшилиш таклифлари бир қатор давлат раҳбарларига, жумладан, Ўзбекистон президенти Шавкат Мирзиёев, Туркия президенти Ражаб Тоййиб Эрдўған ва Миср президенти Абдулфаттоҳ ас-Сисийга юборилган. Россия президенти ҳам таклиф олганини Кремл матбуот котиби Дмитрий Песков аввалроқ тасдиқлаган эди.

Шу билан бирга, Трамп маъмурияти кенгашда доимий аъзоликни истаган давлатлардан 1 млрд долларлик бадал талаб қилмоқда. Бу тўловсиз аъзолик муддати уч йил билан чекланади. Ташаббус атрофидаги музокаралар эса Украинадаги уруш ва глобал бошқарув масалалари бўйича янги сиёсий тортишувларни кучайтирмоқда.