Россияда «Telegram»ни тўлиқ блоклаш бошлади
Россияда «Telegram» иши янада чекланиши мумкин: манбаларга кўра, «Роскомнадзор» секинлаштириш билан чекланмай, мессенжерни тўлиқ блоклаш сценарийини кўриб чиқмоқда.
Россияда «Telegram»га нисбатан давлат босими янги босқичга чиқмоқда. «РБК» манбаларининг хабар беришича, «Роскомнадзор» мессенжер ишини янада кучлироқ чеклаш, зарурат туғилса, уни тўлиқ блоклаш чораларини ҳам ишлаб чиқмоқда. Фойдаланувчилар «Telegram»даги узилишлардан илк бор 9 феврал куни оммавий равишда шикоят қила бошлади.
Икки манбанинг айтишича, 10 феврал куни «Telegram» фаолиятини «қисман чеклаш» бўйича техник чоралар қўлланиши мумкин. Яна бир суҳбатдош эса секинлаштириш амалда аллақачон бошланганини таъкидлаган. Шикоятлар асосан фото ва видеоларнинг юкланмаслиги, хабарларнинг кеч етиб бориши билан боғлиқ.
Журналист ва «Крипта» китоби муаллифи Андрей Захаровга кўра, «Telegram» яқин кунларда шунчалик секинлаштириладики, у орқали оддий матнли хабар юбориш амалда имконсиз бўлиб қолиши мумкин.
Ҳозирча расмий изоҳлар йўқ
Давлат Думасининг ахборот сиёсати қўмитаси раиси ўринбосари Александр Юшченко «ТВЦ» телеканалига берган изоҳида қўмита даражасида «Telegram»ни секинлаштириш масаласи муҳокама қилинмаганини билдирди. Унинг айтишича, «Роскомнадзор» фақат қонунчиликка оид даъволар юзага келган тақдирда блоклаш чораларини қўллаши мумкин.
Шу билан бирга, Захаровнинг таъкидлашича, «Telegram»га нисбатан чекловлар янги эмас. 2025 йил август ойида «Роскомнадзор» мессенжердаги овозли қўнғироқларни чеклаган, расмий сабаб сифатида эса фирибгарлик ва терроризмга қарши кураш кўрсатилган эди. Сўнгги кунларда эса ҳатто кичик файллар ҳам қийинлик билан юкланаётгани кузатилмоқда.
9 февраль куни эрталаб Telegram ишидаги узилишлар оммавий тус олди. «Downdetector» ва «Сбой.рф» платформаларига турли ҳудудлардан юзлаб шикоятлар келиб тушган. Муаммолар Android, iOS ва десктоп тизимларида қайд этилган.
Аввалроқ, 2025 йил охирига келиб «WhatsApp» Россияда деярли тўлиқ секинлаштирилган, Telegram эса ҳанузгача асосий функцияларни сақлаб қолган эди. Энди эса «Telegram» ҳам тўлиқ блокланиш хавфига дуч келмоқда. Бу эса ахборот майдонида, бизнес коммуникациялар ва рақамли реклама бозорида жиддий оқибатларга олиб келиши мумкин.
