50 ҳудуд учун бизнес режалар ишлаб чиқилади

Ўзбекистон Президентининг ПҚ-49-сон қарорига мувофиқ, 2026 йилда ҳудудларни янгича ёндашувлар асосида ривожлантириш орқали аҳоли даромадини ошириш ва камбағалликни қисқартириш мақсадида 50 та шаҳар ва туман учун алоҳида бизнес режалар ишлаб чиқилади. Лойиҳа Олмазор тумани тажрибаси асосида амалга оширилади.

Янги тизим Тошкент шаҳрининг барча туманларини, шунингдек, мамлакат бўйлаб 38 та шаҳар ва туманни қамраб олади. Улар қаторида Нукус, барча вилоят марказлари, Ангрен, Чирчиқ, Янгийўл, Қўқон, Марғилон, Шаҳрисабз, Зарафшон, Урганч ва Хива бор. Ҳоким ёрдамчилари тадбиркорлик ташаббусларини амалга ошириш учун махсус лойиҳа гуруҳларига бирлаштирилади.

Иқтисодиёт ва молия вазирлиги вилоят ҳокимликлари ҳамда Қорақалпоғистон Вазирлар Кенгаши билан ҳамкорликда бир ой муддатда ҳудудларнинг бизнес режаларини ишлаб чиқиб, Вазирлар Маҳкамасига киритади. Лойиҳа гуруҳлари фаолиятини ташкил этишда Иқтисодиёт ва молия вазирлиги, Бандлик вазирлиги ва маҳаллий ҳокимликлар масъул этиб белгиланган.

Қарорга кўра, иштирокчи ҳудудлар ҳокимлари маҳаллий бюджетнинг орттириб бажарилган қисми ҳисобидан ҳоким ёрдамчиларига самарадорлик учун устама тўлаш ҳуқуқига эга бўлади. Мувофиқлаштириш учун лойиҳа гуруҳлари ишига мутахассисларни жалб қилишга ҳам рухсат берилади.

Шунингдек, муаммоли кредитларни ундириш бўйича қўшимча рағбатлантириш механизми жорий этилмоқда. Оилавий тадбиркорлик дастурлари доирасида 2022 йилгача ажратилган кредитлар бўйича ундирилган қарз суммасининг 20 фоизи, 2022 йилдан 2025 йил бошигача берилган кредитлар бўйича эса 10 фоизи миқдорида бонус тўланади.

Бундан ташқари, «оғир» маҳаллалар учун мастер-режалар ишлаб чиқувчи талабаларни қўллаб-қувватлаш мақсадида 100 миллион сўмлик грант дастури йўлга қўйилади. Грантлар танлов асосида ажратилади.

Эслатиб ўтамиз, айнан шу қарор билан маҳаллаларда уй меҳмонхоналарини ташкил қилиш учун 150 млн сўмгача гаровсиз кредит ажратилиши ҳам белгиланган.