Илон Маск билан жанжал «Ryanair» авиачипталарининг арзонлашувига олиб келди
Илон Мас ва «Ryanair» бош директори Майкл О’Лирининг «X» ижтимоий тармоғидаги очиқ тортишуви авиакомпаниянинг кутилмаган маркетинг юришига айланди.
Ижтимоий тармоқдаги жанжал
Ирландиянинг «Ryanair» авиакомпанияси «Х» (собиқ «Twitter») тармоғидаги оммавий тортишувдан кейин катта акция эълон қилди. Компания аккаунти америкалик миллиардер Илон Маскнинг авиакомпанияни сотиб олиш ҳақидаги ишорасига кескин муносабат билдирди. Натижада «Ryanair» «Илон ва Х’даги бошқа ҳар қандай аҳмоқлар учун махсус катта сотув» шиори остида билетлар сотувини бошлади, деб ёзади «Зеркало» нашри.
Авиакомпания ижтимоий тармоқда Маскни мазах қилган ҳолда, унинг таклифини жиддий қабул қилмаслигини очиқ намоён қилди.
Оммавий акция ва изоҳлар
«Ryanair» раҳбари Майкл О’Лири бизнесменни қаттиқ танқид қилиб, Маск «авиакомпанияларга эгалик қилиш қоидаларини самолёт аэродинамикасидан ҳам камроқ тушунади», дея баёнот берди. Компания расмий аккаунтида эса «Эҳтимол, Маск дам олиши керакдир?» деган кинояли изоҳ қолдирилди.
Шундан сўнг Ryanair 100 мингта бир томонлама авиачиптани 16,99 евродан сотишини эълон қилди. «Ҳозироқ сотиб олинг, Маск ҳаммасини олиб кетишидан олдин!» деган ёзув билан акция янада оммалаштирилди. Кейинчалик компания бу арзонлашув учун «катта «аҳмоқ» Илон Маскка раҳмат айтиш керак»лигини ҳам қўшимча қилди.
Можаронинг келиб чиқиши
Жанжалга «Ryanair» авиакомпаниясининг ўз самолётларига «Starlink» сунъий йўлдошли интернетини ўрнатишдан бош тортиши сабаб бўлган. Лоукостер «Boeing 737» самолётларида «Starlink»ни жорий этишни рад этганидан кейин, Маск ва О’Лири «Х» тармоғида ўзаро ҳақоратларга ўтиб кетган.
Шундан сўнг Маск авиакомпаниянинг қиймати ҳақида сўраб, обуначиларига уни сотиб олиш керакми-йўқми деган саволнома билан мурожаат қилган эди. Бу эса «Ryanair» томонидан ҳазил ва маркетингни бирлаштирган жавобга сабаб бўлди. Натижада, ижтимоий тармоқдаги жанжал компания учун катта реклама ва билетлар сотувининг ошишига айланди.
