Жаҳон смартфон бозорида Apple етакчилик қилмоқда
2025 йилда глобал смартфон бозорида Apple 20 фоиз улуш билан Samsung ва Xiaomi’ни ортда қолдирди.
2025 йилда дунё бўйлаб смартфон етказиб бериш ҳажми ўтган йилга нисбатан 2 фоизга ошди. Бу ўсиш, асосан, ривожланаётган бозорларда талабнинг кучайиши ва иқтисодий фаолликнинг тикланиши билан боғлиқ. Бу ҳақда дунё бозорларини таҳлил қилувчи «Counterpoint Research» компанияси маълум қилди.
Таҳлилларга кўра, 2025 йил якунида глобал смартфон бозорида етакчиликни Apple эгаллади. Компания 20 фоиз бозор улуши билан биринчи ўринни сақлаб қолган. Бу натижа, аввало, ривожланаётган ва ўрта сегмент бозорларида талабнинг барқарор бўлиши, шунингдек, iPhone 17 сериясининг юқори савдоси ҳисобига эришилган. «Counterpoint» таҳлилчиси Варун Мишранинг таъкидлашича, Apple бешта энг йирик бренд орасида энг кучли позицияга эга бўлган.
Ишлаб чиқарувчилар йил бошида эҳтимолий тарифлар таъсиридан олдинроқ ҳаракат қилиш мақсадида етказиб беришни тезлаштирган. Бироқ 2025 йилга келиб ушбу омилнинг таъсири пасайган ва йилнинг иккинчи ярмида етказиб бериш ҳажмлари сезиларли даражада ўзгармаган.
Бозорда иккинчи ўринни 19 фоиз улуш билан Samsung эгаллади. Компания етказиб беришда камтарона ўсишни қайд этган. Учинчи ўринга эса 13 фоиз улуш билан Xiaomi жойлашган. Xiaomi’нинг натижалари, асосан, ривожланаётган бозорларда талабнинг барқарор сақланиши билан изоҳланмоқда.
«Counterpoint» тадқиқот директори Тарун Патхакнинг сўзларига кўра, жаҳон смартфон бозори 2026 йилда маълум даражада секинлашиши мумкин. Бунга чиплар танқислиги, бутловчи қисмлар нархининг ошиб бориши ҳамда чип ишлаб чиқарувчиларнинг сунъий интеллектга йўналтирилган маълумот марказларини мобил қурилмалардан устун қўяётгани сабаб бўлиши мумкин.
Эслатиб ўтамиз, 2025 йилнинг октябр ойи якунига кўра Apple 24,2 фоиз улушга етиб, ўз тарихидаги энг юқори кўрсаткични қайд этгани ҳақида хабар бергандик.
