Макрон Европа ва Путин ўртасида тор форматдаги мулоқотни таклиф қилди

Франция президенти Эмманюэл Макрон Европа ва Кремл ўртасида тўғридан тўғри мулоқотни тиклаш тарафдори эканини яна бир бор билдирди. Унинг айтишича, Россия президенти Владимир Путин билан ҳамкорлик «яхши ташкил этилган» бўлиши ва тор форматда ўтказилиши керак. Бу ҳақда у бугун, 10 феврал куни «Le Monde», «Süddeutsche Zeitung», «El Pais» ва бир неча бошқа Европа газеталарига берган интервюсида маълум қилди.

Макроннинг таъкидлашича, дастлабки «техник» алоқалар Россиянинг Украинага қарши урушни якунлаш истаги йўқлигини тасдиқлаган. У феврал ойи бошида тўғридан тўғри мулоқотга тайёргарлик кўриш учун ўз дипломат маслаҳатчисини Москвага юборганини ҳам тасдиқлади.

«Мен нимага эришдим? Россия ҳозир тинчлик истамайди, деган тасдиқга эришдим. Аммо барибир, биз бу муҳокама каналларини техник даражада тикладик», – деди президент.

«Кўп иштирокчисиз» Европа йўналиши

Макрон бу тажрибани европалик ҳамкорлари билан бўлишмоқчи ва Кремл билан мулоқот учун «яхши ташкил этилган Европа йўналиши»ни ишлаб чиқмоқчи. Унинг айтишича, мулоқот «кўп иштирокчисиз, аниқ мандат ва оддий вакиллик билан» ўтиши керак.

Франция раҳбари, шунингдек, АҚШга бу алоқани топшириш тарафдори эмас, чунки улар Россия билан аллақачон музокара олиб бормоқда. У Америка элчилари Европа номидан Украинага Евроиттифоққа қўшилиш санаси бўйича музокара олиб бориши мумкин эмас, деб ҳисоблайди.

«Бизнинг географиямиз ўзгармайди. Бизнинг хоҳишимизга қарамай, Россия ҳамон шу ерда бўлади. Ва у тўғридан тўғри дарвозамиз олдида», – деди француз президенти.

У Украинада тинчликқа эришилгандан сўнг европаликлар «Россия билан Европа учун янги хавфсизлик архитектурасини қуришига тўғри келиши»ни қўшимча қилди.

АҚШ билан «чуқур геосиёсий фарқ»

АҚШ президенти Доналд Трампнинг Арктика бўйича ҳудудий талабларига муносабат билдириб, Макрон АҚШ билан «чуқур геосиёсий фарқ» борлигини таъкидлади.

«Ҳозир биз «Гренландия лаҳзаси» деб атайдиган босқичдамиз. Бу воқеа шубҳасиз, европаликларга улар таҳдид остида эканини англатди ва АҚШ қанчалик узоқка боришга тайёрлигини билмайди”, – деб қўшимча қилди Макрон.

Президентнинг фикрича, Европа «ўзини кузатувчи ёки иштирокчи сифатида кўришни хоҳлайдими» деган саволга жавоб топиши керак. Шу билан бирга, у «Хитойнинг бизнес даражасидаги цунами» экани ва АҚШ томонидан «микросекундлик беқарорлик» борлигини ҳам таъкидлади.

«Агар ҳеч нарса қилинмаса, Европа беш йил ичида босиб кетилади», – деб ҳисоблайди Макрон.

Ҳимоя, «яшил» технологиялар ва СИга инвестиция

Франция президенти савдо можароларида АҚШ ва Хитой билан боғлиқ масалаларда еврооблигациялар чиқариш ва Европа саноатини ҳимоя қилишни қайтадан таклиф қилди.

Шу билан бирга, Макрон инвестициялар асосан мудофаа саноати, «яшил» технологиялар, сунъий интеллект ва квант компютерлари ривожига йўналтирилиши кераклигини таъкидлади.

У Франция ва Германия муносабатлари мустаҳкамланганини ва бу Германия канцлери Фридрих Мерцнинг ҳокимиятга келишидан кейин содир бўлганини эътироф этди. «Франко-герман шериклиги Европа олдинга ҳаракат қилиши учун зарур. Аммо шунинг ўзи етарли эмас», деди у икки мамлакатнинг Италия билан ҳамкорлиги мустаҳкамланганини таъкидлаб.