Трамп ўзини Венесуэла президенти сифатида кўрсатилган расмини эълон қилди
АҚШ президенти ижтимоий тармоқда ҳазил пост қолдириб, Венесуэладаги сўнгги сиёсий воқеаларга ишора қилди.
АҚШ президенти Доналд Трамп Truth Social ижтимоий тармоғида у Венесуэла президенти вазифасини бажарувчи сифатида кўрсатилган ҳазил суратни эълон қилди. Пост жамоатчиликда катта қизиқиш уйғотиб, сиёсий муҳокамаларга сабаб бўлди.
Сурат Трампнинг «Википедия»даги таржимайи ҳоли скриншоти кўринишида тайёрланган. Унда Трамп АҚШнинг 45- ва 47-президенти сифатида, шунингдек 2026 йил январидан Венесуэла президенти вазифасини бажарувчи сифатида қайд этилган.
Эслатиб ўтамиз, 3 январга ўтар кечаси АҚШ ҳарбийлари Венесуэлада махсус амалиёт ўтказган. Амалиёт давомида мамлакатнинг амалдаги президенти Николас Мадуро ва унинг рафиқаси Силия Флорес қўлга олинган. Улар АҚШда наркотерроризм, қурол сақлаш ва гиёҳванд моддалар контрабандаси айбловлари бўйича суд қилинмоқда.
Амалиётдан кейин ўтказилган матбуот анжуманида Трамп Мадуро энди президент эмаслигини маълум қилди. Унинг сўзларига кўра, ўтиш даврида Венесуэла бошқаруви вақтинча АҚШ назоратида бўлади. Шу билан бирга, Трамп мухолифат етакчиси Мария Корина Мачадони давлат раҳбарлиги учун етарли салоҳиятга эга эмас, дея баҳолаган.
Ўша куни Венесуэла вице-президенти Делси Родригес вақтинча давлат раҳбари сифатида қасамёд қилган. Трамп эса янги раҳбарият «тўғри йўл тутмаса», Мадурога нисбатан қўлланилган чоралардан ҳам оғирроқ оқибатлар бўлишини таъкидлаган.
Шунингдек Доналд Трамп маъмурияти Родригесга тўртта талаб қўйган:
Биринчи талаб — Венесуэлада наркотрафикка қарши курашни кескин кучайтириш.
Иккинчи талаб — АҚШга душман деб ҳисобланган давлатлар ва тармоқларга мансуб шахсларни мамлакатдан чиқариб юбориш. Гап, аввало, Эрон, Куба ҳамда бошқа давлатларнинг махсус хизмат вакиллари ҳақида кетмоқда.
Учинчи талаб нефт соҳасига тааллуқли. АҚШ Венесуэла нефтининг Америкага қарши давлатларга сотилишини тўхтатишни талаб қилмоқда. Манбаларга кўра, бу талаб бажарилмаса, иқтисодий босим ва санкциялар сақланиб қолади.
Тўртинчи талаб — Венесуэлада эркин ва адолатли сайловлар ўтказишга кўмаклашиш ва кейинчалик ҳокимиятдан кетиш.
