Яқин Шарқдаги хатарлар баҳоланар экан, нефт нархлари бир оз пасайди
АҚШ томонидан Ҳормуз бўғози орқали ҳаракатланаётган кемалар учун берилган кўрсатмалардан сўнг, таҳлилчилар эҳтимолий таъминот узилишлари хавфини баҳоламоқда.
Бугун, 10 феврал куни нефт нархлари бир оз пасайди. Бунга сабаб шуки, савдогарлар АҚШ томонидан Ҳормуз бўғози орқали ҳаракатланаётган кемалар учун берилган кўрсатмалардан сўнг, эҳтимолий таъминот узилишлари хавфини баҳоламоқда. Бу ҳолат Вашингтон ва Теҳрон ўртасидаги кескинликка эътиборни янада кучайтирди, деб хабар берди «Reuters».
«Brent» маркали нефт фючерслари баррел учун 18 сентга ёки 0,26 фоизга пасайиб, 68,85 долларга тушди. АҚШнинг «West Texas Intermediate» (WTI) нефти эса 21 сентга ёки 0,33 фоизга арзонлаб, баррели 64,15 долларни ташкил қилди.
Бу пасайишдан олдин, 9 феврал куни нархлар 1 фоиздан ортиқ ўсган эди. Ўшанда АҚШ Транспорт вазирлиги ҳузуридаги Денгиз маъмурияти АҚШ байроғи остидаги тижорий кемаларга Эроннинг ҳудудий сувларидан имкони борича узоқроқда юришни, шунингдек, Эрон кучлари томонидан бортга чиқиш учун рухсат сўралса, оғзаки рад жавобини беришни тавсия қилган эди.
Эҳтимолий хавф
Дунё бўйлаб истеъмол қилинадиган нефт ҳажмининг тахминан бешдан бир қисми Уммон ва Эрон орасида жойлашган Ҳормуз бўғози орқали ўтади. Шу сабабли ушбу ҳудуддаги ҳар қандай кескинлашув жаҳон нефт таъминоти учун жиддий хавф ҳисобланади.
Эрон, шунингдек, ОПЕК аъзолари бўлган Саудия Арабистони, Бирлашган Араб Амирликлари, Қувайт ва Ироқ ўз нефтининг асосий қисмини айнан шу бўғоз орқали, асосан Осиё бозорларига экспорт қилади.
Бу кўрсатмалар ўтган ҳафта Эроннинг бош дипломати Уммон воситачилигида АҚШ билан олиб борилаётган ядровий музокаралар «яхши бошлангани» ва давом эттирилишини айтганига қарамасдан эълон қилинди.
«Уммондаги музокаралар эҳтиёткорона ижобий руҳда ўтган бўлса-да, эҳтимолий кескинлашув, санкцияларни кучайтириш ёки Ҳормуз бўғозида таъминот узилиши хавфига оид ноаниқлик нефт нархларида маълум даражада хавф устамасини сақлаб қолмоқда», – деб ёзди «IG» компанияси таҳлилчиси Тони Сайкамор мижозлар учун тайёрланган изоҳида.
Россия нефтига тақиқ
Шу билан бирга, Европа Иттифоқи Россияга қарши санкцияларни кенгайтиришни таклиф қилди. «Reuters» томонидан кўриб чиқилган ҳужжатга кўра, янги таклифда Россия нефтини қайта ишлайдиган Грузия ва Индонезия портларини ҳам санкциялар рўйхатига киритиш назарда тутилган. Бу ЕИнинг учинчи мамлакатлар портларини илк бор нишонга олиши бўлади.
Бу қадам Украинадаги уруш фонида Москва учун асосий даромад манбаларидан бири бўлган Россия нефтига нисбатан босимни кучайтиришга қаратилган.
Шу орада, савдогарлар маълум қилишича, «India Oil Corp» (IOC.NS) Ғарбий Африка ва Яқин Шарқдан жами олти миллион баррел нефт харид қилди. Бу Ҳиндистоннинг Вашингтон билан савдо келишувига интилиши доирасида Россия нефтидан эҳтиёткорлик билан воз кечаётгани билан боғлиқ.
