2026 йилда нефт нархи арзонлашиши кутилмоқда – «Goldman»
Глобал таҳлилларга кўра, таклиф ортиши ва бозорда профицит шаклланиши 2026 йилда нефт нархларини пасайтиради.
«Goldman Sachs» 2026 йилда нефт бозорида таклиф кескин ошиши натижасида нархлар пасайишини прогноз қилди. «Reuters»да эълон қилинган таҳлилга кўра, Россия, Венесуэла ва Эрон билан боғлиқ геосиёсий хатарлар қисқа муддатли ўзгарувчанликни сақлаб қолиши мумкин.
Қайд этилишича, «Goldman Sachs» инвестиция банки 2026 йил учун ўртача нарх прогнозини ўзгартирмасдан қолдирди. Унга кўра, «Brent» ва WTI нефти бир баррели мос равишда 56 ва 52 доллар атрофида шаклланади. Тўртинчи чоракда эса нархлар 54 ва 50 долларгача тушиши кутилмоқда, бу эса OECD мамлакатларида захиралар кўпайиши билан боғлиқ.
«Goldman» таҳлилчилари 2026 йилда кунига 2,3 млн баррел ҳажмда бозор профицити юзага келишини тахмин қилмоқда. Уларнинг фикрича, бу ҳолат ОПЕКдан ташқари ишлаб чиқариш ўсишини секинлаштириш ва талабни қўллаб-қувватлаш учун нархларнинг пасайишини талаб қилади. Банк катта миқёсли узилишлар ёки OPEC томонидан ишлаб чиқариш қисқартирилиши кутилмаётганини таъкидлади.
Ҳозирги пайтда «Brent» нефти тахминан 63 доллар, АҚШдаги WTI эса 59 доллар атрофида савдо қилинмоқда. Ўтган йилда ҳар икки эталон ҳам 2020 йилдан бери энг ёмон йиллик натижани кўрсатиб, қарийб 20 фоизга арзонлаган эди.
Банк АҚШ сиёсатчилари энергия таъминоти барқарорлиги ва нисбатан паст нархларга устувор аҳамият бериши оралиқ сайловлар арафасида нефт қимматлашувини чеклаб туришини қайд этди. Шу билан бирга, нархлар 2027 йилдан босқичма-босқич тикланиши, таклиф секинлашиб, талаб ўсиши давом этиши мумкин.
«Goldman» 2027 йилда «Brent» ва WTI ўртача нархини 58 ва 54 доллар даражасида баҳолади. Узоқ муддатда эса, инвестиция етишмаслиги сабаб талаб ўсиши натижасида 2030–2035 йилларда нархлар яна юқорилаши мумкин.
Маълумот ўрнида, «Goldman Sachs» — бу АҚШда жойлашган, дунёдаги энг йирик инвестицион банклардан бири бўлиб, инвестиция банкинги, активларни бошқариш ва молиявий консалтинг хизматларини кўрсатади. У халқаро молия бозорларида йирик компаниялар, ҳукуматлар ва инвесторлар учун стратегик ва молиявий ечимлар тақдим этади.
