Ким Чен Ин 13 ёшли қизини ҳокимият вориси этиб тайинламоқчи
Жанубий Корея разведкасига кўра, Шимолий Кореяда ворис тайинлаш жараёни бошланди.
КХДР етакчиси Ким Чен Ин яқин вақт ичида ўз қизи Жу Эни ворис сифатида элон қилади. Бу ҳақда Жанубий Корея оммавий ахборот воситалари мамлакат разведка хизматига таяниб хабар бермоқда.
Малумотларга кўра, Жанубий Корея разведкаси Шимолий Корея етакчиси Ким Чен Иннинг қизи — Жу Эни ҳокимият вориси этиб тайинлаш жараёнига киришганини малум қилган. Бу баёнот аввалги «энг эҳтимолли ворис» деган тахминлардан кўра анча аниқроқ хулоса ҳисобланади.
Расмий тадбирлар ва сиёсий фаоллик: Ворислик аломатлари
Жанубий Корея парламентининг разведка бўйича қўмитаси ўтказган ёпиқ брифингда депутатлар Пак Сон Вон ва Ли Сон Кин журналистларга малум қилишича, бундай хулосага келишга Жу Энинг сўнгги пайтларда давлат сиёсатига оид айрим масалаларда ўз фикрини билдиргани асос бўлган.
«Ким Жу Э Корея халқ армияси ташкил этилганининг йиллик маросимида ва Кумсусан саройига ташриф каби турли расмий тадбирларда иштирок этгани, шунингдек, давлат бошқарувининг баъзи йўналишлари бўйича ўз фикрини билдиргани сабабли, разведка хизмати уни ворисликка тайинлаш жараёни бошланган деб ҳисобламоқда», — деди Ли.
13 ёшли эҳтимолий раҳбар
Таъкидланишича, ушбу малумотлар энди Жу Э «ворис этиб тайинланиш» арафасидаги шахс сифатида кўрилаётганини англатади.
Малумот учун, разведка малумотларига кўра, Ким Чен Иннинг қизи 2013 йилда туғилган.
