Трамп: Путин энергетик «оташкесим» бўйича «сўзида турди»

АҚШ президенти Доналд Трамп Россия президенти Владимир Путин гўё унга берган сўзида турганини, кучли совуқ пайтида бир ҳафта давомида украин шаҳарларини ўққа тутмасликка ваъда берганини айтди.

«Бу якшанба кунидан якшанбагача эди, кейин ҳаммаси қайта бошланди ва у ўтган тун қаттиқ зарба берди. У сўзида турди. Бу катта нарса, биласиз, бир ҳафта... Жуда-жуда совуқ эди, лекин бу якшанба кунидан бошланган ва у якшанбагача чидади», – деди Трамп кеча, 3 феврал куни оқшомида Оқ уйда журналистлар саволларига жавоб берар экан.

Оқ уй раҳбари яна бир бор Путинни Кремл томонидан қарийб тўрт йил аввал бошланган Украинадаги урушни тугатишга чақирди.

«Мен уни урушни тўхтатишини истайман. Мен унинг бундай қилишини истардим», – деди Трамп журналистнинг Путин нега сулҳни узайтирмаганидан хафами, деган саволга жавобан.

Шу куни эртароқ Оқ уй матбуот котиби Каролайн Левитт Трамп 3 феврал куни тунги пайтда Россия томонидан Украина пойтахти Киевга қилинган йирик ракета ва дронлар ҳужумидан «ҳайратланмаганини» айтган эди.

«Бугун эрталаб бу ҳақда президент билан гаплашдим ва, афсуски, унинг реакцияси ҳайрат эмас эди. Бу бир неча йилдан бери жуда шафқатсиз уруш олиб бораётган икки давлат. Агар президент ҳали ҳам ҳокимиятда бўлганида, бу уруш умуман бошланмаган бўларди», – деб тушунтирди у журналистларга.

Трамп 29 январ куни: Путин Украина шаҳарларига бир ҳафта зарба бермасликка рози бўлди

Доналд Трампнинг айтишича, 29 январ куни Оқ уйда ўз маъмурияти йиғилишида у шахсий мурожаатидан сўнг Путин кучли совуқ сабаб яқин етти кун ичида Киев ва бошқа украин шаҳарларини ўққа тутмасликка рози бўлган. Бу суҳбат неча кун олдин бўлиб ўтганини у очиқламади. Ўша куни Украина президенти Владимир Зеленский ҳам қишки совуқ даврда энергетик оташкесим бўйича келишувга эришилганини тасдиқлади ва Трампнинг баёнотини олқишлади.

Украина Қуролли Кучлари Ҳаво кучларининг кунлик ҳисоботларига кўра, 26 январ куни тунги пайтда Россия Украинага 138 та зарбали дрон учирган; кейинги сутка давомида – 135 та дрон; 28 январ куни 146 та дрон ва «Искандер-М» ракетаcи билан ҳужум қилган; 29 январ – 105 та дрон; 30 январ – 111 та дрон ва яна «Искандер-М» ракетаcи. Россия ўққа тутишлари интенсивлигининг нисбатан камайиши фақат 1 феврал тунги пайтда (85 та зарбали дрон) ва 2 феврал куни (90 та дрон) кузатилди.

Россия ва унинг «энергетик оташкесим»и

Россия 2 феврал тунги пайтда Украина энергетик инфратузилмасига зарбаларни қайта бошлаб, Трамп томонидан тўрт кун олдин эълон қилинган «энергетик оташкесим»ни бузди. Украина энергетика вазирининг биринчи ўринбосари Артём Некрасовнинг айтишича, Россия қўшинлари Харков, Суми, Днепропетровск ва Черкасси вилоятларидаги энергетик объектларга ҳужум қилган. 3 феврал тунги пайтда Украина Қуролли Кучлари Ҳаво кучлари, шунингдек, Киев ва Харков ҳокимиятлари «Telegram» орқали мамлакатнинг бир қатор ҳудудларига қарши оммавий комбинирланган зарбалар берилганини хабар қилди.

Ушбу ҳужумлар вақтида Россия жами 450 та дрон ва 60 тадан ортиқ ракета қўллаганини мамлакат ташқи ишлар вазири Андрей Сибига «X» ижтимоий тармоғида ёзди. Унинг сўзларига кўра, Путин ҳарорат пасайишини кутган ва Украина энергетик тизимига зарба берган.

Киев АҚШнинг реакциясини кутмоқда, сенатор Украинага «Tomohawk» етказиб беришга чақирди

Украина президенти Владимир Зеленский 3 феврал куни кечқурун «Telegram»да ёзишича, Украина ҳукумати Россиянинг навбатдаги тажовузкор ҳаракатларига Вашингтоннинг реакциясини кутмоқда.

«Бу айнан Америка томонидан берилган таклиф эди: дипломатия даврида ва шундай совуқ қиш шароитида энергетикага зарбаларни тўхтатиш», – дея эслатди у ва АҚШ президентининг шахсий илтимосига Россия «баллистика бўйича рекорд» билан жавоб берганини таъкидлади.

Зеленскийнинг қайд этишича, «Россиядан сўралган ҳафтанинг тўрт куни ҳам ўтмаган».

«Россиянинг урушга бўлган ставкаси дунё жавобини олиши керак», – деб яна бир бор чақириқ қилди у.

Ўз навбатида, Жанубий Каролинадан сайланган республикачи сенатор Линдси Грэм «Путинни музокаралар столига ўтиришга ва Украинага оммавий ҳужумларни тўхтатишга мажбурлаш учун қилаётган босимимиз ишламаяпти», – деб тан олди. Трампнинг сафдоши Путиннинг «ҳарбий машинаси»ни қўллаб-қувватлаётган нефть харидорларини таъқиб қилиш борасидаги саъй-ҳаракатларини эътироф этган ҳолда, 3 феврал тунги навбатдаги оммавий ҳужумдан кейин президентни «Украинага ҳарбий жиҳатдан вазиятни ўзгартирадиган «Tomahawk» ракеталарини етказиб бериш жараёнини бошлашга» чақирди.

«Яқин кунлар ва ҳафталарда Путинга босимни кучайтиришимиз керак. Агрессияни ҳаддан ташқари рағбатлантириш сифатида қабул қилинадиган ҳар қандай музокаралар бутун дунёда фалокатларга олиб келади. Аксинча ҳам тўғри: агар музокаралар эркин, кучли ва мустақил Украина яратилишига олиб келса, у муайян ён беришларга мажбур бўлган бўлса ҳам, дунё анча барқарор бўлади. Вақт ҳал қилувчи аҳамиятга эга», – деб ёзди Линдси Грэм «X» ижтимоий тармоғида.

Украина, АҚШ ва Россия ўртасидаги Абу Дабидаги музокаралар қолдирилди

Россиянинг Украинага қарши урушини якунлаш бўйича Украина, Россия ва АҚШ ўртасидаги навбатдаги музокаралар 4-5 февралга кўчирилди ва Абу Дабида ўтади, деб хабар қилди 1 феврал куни президент Зеленский.

«Украинада тинчлик бўйича музокаралар Россия ва АҚШ учрашувидан сўнг қолдирилди», – деб ёзди шу куни «The New York Times» газетаси, музокараларнинг сўнгги раунди нега кўчирилгани сабаблари аниқ эмаслигини таъкидлаб.

БААда 1 феврал куни режалаштирилган муҳокамалардан бир кун олдин Россия президентининг хорижий давлатлар билан инвестиция-иқтисодий ҳамкорлик бўйича махсус вакили Кирилл Дмитриев Флоридада Америка делегацияси билан музокаралар ўтказди. Дмитриевнинг тушунтиришича, томонлар ҳам «Украина бўйича тартибга солиш», ҳам АҚШ билан иқтисодий ҳамкорлик мавзуларини муҳокама қилган.