Самарқандда нонга чиққан қизалоқни «адашиб» ўғирлаб кетган эркаклар беш йилга қамалди

Самарқанд вилояти Каттақўрғон туманида тўрт нафар эркак дўконга нон сотиб олиш учун чиққан 14 ёшли қизни сочларидан тортиб, машинага миндириб ўғирлаб кетган. Бу ҳақда Олий суд матбуот котиби Азиз Абидов Vaqt.uz'га маълум қилди.

Суд ҳужжатларига кўра, 2025 йил 6 август куни тонг соат 04:30 ларда 1995 йилда туғилган Б.Х., унинг 29 ёшли таниши М.М., 28 ёшли таниши А.М. ва 24 ёшли У.З. маст ҳолатда «Nexia-1» автомобилида кетаётиб, М-37 йўлида нон олиш учун чиққан вояга етмаган Ф.О.ни (2011 йилда туғилган) кўриб қолишган. Судланувчилар қизни «тунги клубларда юрадиган таниш қиз» деб ўйлаб, уни куч ишлатиб, сочларидан тортиб машинага мажбурлаб миндиришган.

Машина ичида қиз йиғлаб, онаси нонга чиқарганини айтиб, қўлидаги 8 000 сўм пулини кўрсатган. Ўшанда А.М. қизга улар ИИБ ходимлари эканини айтган.

«Бир қиз онасини ўлдириб қочиб кетди. Шунинг учун биз сени тўхтатиб, машинага ўтқаздик», - деган у қизга. Кейин эркаклар адашиб бошқа қизни ушлашганини тушуниб, уни олиб кетишган жойига олиб борган ва ўша ерда қолдирган.

Қизни машинага мажбурлаб миндириш вақтида судланувчи Б.Х.нинг телефони воқеа жойида тушиб қолган. Ушбу телефон ва ҳудуддаги кузатув камералари ёрдамида улар қўлга олинган.

Б.Х. ва унинг шериклари суд мажлисида ўз айбларини тўлиқ тан олган, аммо «хато қилишганини» таъкидлаган.

Б.Х. кўрсатмаси

Б. Х. суддаги кўрсатмасида 2025 йил 5 август куни кечқурун шериклари билан пиво ичиб ўтиришганини, сўнг машинада кетаётиб йўл четидаги қизни кўришганини айтган. Шерикларидан бири бу қизни «тунги клубларда юрадиган таниши» эканини айтгач, у билан жинсий алоқа қилиш мақсадида машинага мажбурлаб миндиришган. Қиз йиғлаб, онаси нонга чиқарганини айтиб, қўлидаги 8 000 сўм пулини кўрсатганидан кейингина адашганларини тушуниб, уни ташлаб кетишган.

М.М. ва У. З кўрсатмаси

М. М. айбига қисман иқрор бўлган. У судда машинани у бошқаргани, қизни қўрқитиш учун ўзларини «ИИБ ходимлари» деб таништирганини ва гўёки бир қиз онасини ўлдириб қочиб кетгани учун уни ушлаганини айтган. яна бир судланувчи У. З. айбига тўлиқ иқрор бўлган.

Воқеа

Қизнинг айтишича, йўлдан ўтаётганда машинадан бир бола (Б. Ғаниев) тушиб, унинг сочидан тортиб, машина томон судраган. У қаршилик кўрсатиб, боланинг оёғига тепган, лекин бола унинг оғзини ёпиб, иккинчи шеригини ёрдамга чақирган. Иккаласи уни боши ва елкасидан босиб, машина ичига мажбурлаб тиқишган. Машинадан тушмоқчи бўлганида уни сочидан тортиб, бошига уришган ва «овозингни ўчир» деб қўрқитишган. Қиз уларга қўлидаги пулини кўрсатиб, ёлворган. Шунда ҳайдовчи ўзларини «милиция ходимлари» деб таништириб, уни қотилликда гумон қилишаётганини айтган.

Бироздан сўнг «бу бошқа қиз экан» деб, уни қоронғу жойга ташлаб кетишган. Қиз машинадан тушаётганда уларни «отамга айтиб, ИИБга топшираман» деганида, улар қўрқиб тезда қочиб кетишган.

Суд ҳукми

Каттақўрғон тумани Жиноят ишлари бўйича судининг 2025 йил 16 декабрдаги ҳукми билан улар Жиноят кодексининг 137-моддаси (Одам ўғирлаш) 2-қисмининг «а» ва «в» бандларида назарда тутилган жиноятни содир этганликда айбдор деб топилди. Б.Х. 5,5 йилга, М.М., А.М. ва У.З. эса 5 йилдан озодликдан маҳрум қилинди. Жазони умумий тартибли колонияларда ўташ белгиланган.