Эрон катерлари АҚШ танкерини эгаллашга уринди

Эроннинг олтита қуролланган катери Ормуз бўғозида, Уммондан тахминан 30 км шимолда, Америка байроғи остида ҳаракатланаётган «Stena Imperative» танкерига яқинлашди. Бу ҳақда кеча, 3 февраль куни «Reuters» агентлиги ва «The Wall Street Journal» газетаси вазиятдан хабардор, исми ошкор этилмаган манбалар ҳамда «Vanguard Tech» консалтинг компанияси маълумотларига таяниб хабар берди.

Қайд этилишича, Эрон катерларидан танкер экипажига двигателни ўчириш ва абордажга (бир кеманинг бошқа кемани куч билан эгаллаш ёки текшириш учун унга чиқиб олиши) тайёрланиш ҳақида буйруқ берилган. Бироқ «Stena Imperative» тезлигини ошириб, ҳаракатни давом эттирган ва кейинчалик АҚШ ҳарбий кемаси кузатувида йўлини давом эттирган.

Эроннинг «Fars» ахборот агентлиги мамлакат расмийларига таяниб маълум қилишича, танкер Ислом Республикасининг ҳудудий сувларига кирган, огоҳлантиришдан сўнг эса хавфсизликка оид «ҳеч қандай жиддий ҳодисаларсиз» ҳудудни тарк этган. «Reuters» эса ўз манбаларига таяниб, мазкур кема Эрон ҳудудий сувларига кирмаганини таъкидламоқда.

Ормуз бўғози Форс кўрфазини Уммон кўрфази, Араб денгизи ва Ҳинд океани билан боғлайди. Ушбу денгиз йўли орқали жаҳон нефт қазиб олиш ҳажмининг тахминан бешдан бир қисми ташилади. 2025 йил июн ойида Ислом инқилоби муҳофизлари корпуси ҳарбий-денгиз кучлари қўмондонлиги вакили АҚШ томонидан ҳужум бўлса, Ормуз бўғозини ёпиб қўйиш билан таҳдид қилган эди.

АҚШ қирувчиси Эрон дронини уриб туширди

«Bloomberg» ва «Associated Press» агентликларининг ёзишича, танкер билан боғлиқ ҳодисадан бироз ўтгач, АҚШнинг «F-35C» қирувчиси Араб денгизида АҚШнинг «USS Abraham Lincoln» авианосеци томон йўналган Эрон дронини уриб туширган. АҚШ Марказий қўмондонлиги баёнотига кўра, дрон авианосецга “ноаниқ ниятлар билан тажовузкорона яқинлашган” ва халқаро сувларда ҳаракат қилаётган АҚШ қўшинлари томонидан кескинликни пасайтириш бўйича кўрилган чораларга қарамай, унинг томон парвозни давом эттирган.

Трамп таҳдидлари фонида Теҳрон Вашингтон билан мулоқотга тайёр

Эрон президенти Масъуд Пезешкиён АҚШ президенти Доналд Трамп томонидан янграган навбатдаги ҳарбий таҳдидлардан сўнг можарони тинч йўл билан ҳал этиш тарафдори эканини билдирди, деб хабар қилди 1 феврал куни «Irna» давлат агентлиги. Пезешкиённинг таъкидлашича, Эрон «ҳеч қачон урушга интилмаган ва ҳозир ҳам унга интилмаяпти».

Шу куни Эрон олий раҳбари оятулло Али Хоманаий агар Вашингтон ҳарбий ҳаракатларни бошласа, «бу сафар минтақавий уруш бўлади», деб огоҳлантирди.

«Биз ҳеч қачон бошловчи эмасмиз ва бирон-бир давлатга ҳужум қилишни истамаймиз. Аммо Эрон халқига ҳужум қилган ёки таҳдид солган ҳар ким қатъий жавоб олади», – деди 86 ёшли Хоманаий давлат телевидениеси орқали.

Трамп: Умид қиламан, келишувга эришамиз

Оқ уй раҳбари эса Теҳронга босимни кучайтириб, яна ҳарбий чоралар билан таҳдид қилди. У Эрон томон қўшимча ҳарбий кемалар йўл олаётганини айтди.

«Ва умид қиламан, биз келишувга эришамиз», – деди Трамп 30 январ куни Оқ уйда журналистларга.

Кейинроқ Флоридага учиб кетаётган самолёт бортида у ўз умидларини аниқлаб: «Улар мақбул бир нарса бўйича келишиб олишларига умид қиламан», – деди Трамп.

АҚШ президенти бир неча бор Эрон раҳбариятига ҳарбий зарбалар билан таҳдид қилган, жумладан, ҳукуматга қарши намойишларни шафқатсиз бостириш билан боғлиқ ҳолда ҳам. Бироқ 31 январ куни Трамп Теҳронга нисбатан қандай йўл тутишни музокаралар натижаларига қараб ҳал қилишини билдирди. Январ бошидан бери минтақада АҚШ ҳарбий иштироки анча кучайтирилди, хусусан «Abraham Lincoln» авианосеци ва уни кузатиб келувчи кемалар етиб келди.

Вашингтон Эрон билан унинг ядровий дастурини тўхтатиш ва баллистик ракеталарни ишлаб чиқишни чеклаш бўйича музокаралар ўтказишни режалаштирмоқда. Улар 6 феврал кунига белгиланган. «Axios» нашри маълумотларига кўра, Эрон ҳукумати учрашувни Истанбулдан Уммонга кўчиришни талаб қилмоқда.